លោក ងិន ឆាយ អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបានថ្លែងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីកាលពីពេលថ្មីៗនេះថា បើទោះជាការនាំចេញបន្លែរបស់កម្ពុជាទៅកាន់ទីផ្សារសហគមន៍អឺរ៉ុបក្នុងបរិមាណតិចតួចក៏ដោយ ប៉ុន្តែកម្ពុជានឹងមានឱកាសកាន់តែល្អប្រសើរសម្រាប់ទីផ្សារនោះ ខណៈវៀតណាម និងថៃទទួលរងការពិន័យកាតក្រហមមិនអាចនាំចូលបន្លែទៅទីផ្សារអឺរ៉ុបបានទេ។
លោកថាដោយសារអ្នកដាំដុះ និងអ្នកនាំចេញមួយចំនួនគ្មានភាពស្មោះត្រង់បានធ្វើឲ្យកម្ពុជាទទួលបានកាតលឿងម្តងកាលពី ៦ ឆ្នាំមុនជាការព្រមាននៃការនាំចូលបន្លែទៅសហគមន៍អឺរ៉ុបដែលមិនបានគោរពតាមគោលការណ៍ស្តង់ដាអនាម័យ និងភូតគាមអនាម័យរបស់អឺរ៉ុប។ តែលោកអះអាងថា ទោះបីយ៉ាងណាបច្ចុប្បន្នកម្ពុជាពុំជាប់ពិន័យកាតលឿងទៀតទេ ដូច្នេះកម្ពុជាអាចធ្វើការនាំចេញបន្លែទៅសហគមន៍អឺរ៉ុបបាន៕
