ត្រីក្បក ឬហៅម្យ៉ាងទៀតថា ត្រីល្អិតពណ៌ប្រាក់ទន្លេមេគង្គ ជាប្រភេទពូជត្រីកម្រ នឹងត្រូវបានបានដាក់ក្នុងបញ្ជី "ងាយរងគ្រោះ" IUCN ត្រូវបានរកឃើញក្នុងទន្លេមេគង្គ នៃប្រទេសកម្ពុជា។
ក្រុមនិស្សិតថ្នាក់ក្រោយឧត្តមសិក្សារបស់គម្រោងអច្ឆរិយភាពនៃទន្លេមេគង្គ កាលពីពេលថ្មីៗនេះ បានធ្វើដំណើរពាសពេញអាងទន្លេសេកុង ទន្លេសេសាន និងទន្លេស្រែពក ទស្សនាផ្សារត្រី និងធ្វើបទសម្ភាសន៍ ជាមួយអ្នកនេសាទក្នុងមូលដ្ឋាន ក្នុងគោលបំណងអង្កេតពីស្ថានភាពប្រភេទត្រី ក្បក។
ក្រុមការងារបានរកឃើញថា រដូវនេះ ត្រីក្បកបានធ្វើការផ្លាស់ទី ដែលមិនធ្លាប់មានពីមុន មក តាមច្រកទន្លេស្រែពកដែលជាដៃទន្លេមេគង្គ។ ហេតុផលនៅពីក្រោយនៃការសម្បូររបស់វាភ្លាមៗ នៅតែជាអាថ៌កំបាំង ប៉ុន្តែអ្នកស្រាវជ្រាវកំពុងធ្វើការយ៉ាងសស្រាក់សស្រាំតាមដានត្រីក្បកនេះ ដើម្បីស្វែងរកចម្លើយ។
គួររំលឹកថា កាលពីខែធ្នូ ឆ្នាំ២០២១ អ្នកនេសាទក្នុងខេត្តរតនគិរី របស់កម្ពុជាបានរាយការណ៍ ថា ប្រភេទត្រីក្បក (Tenualosa thibaudeaui) ដែលរងការគំរាមកំហែង ត្រូវបានចាប់បាន ភ្លាមៗក្នុងចំនួនដ៏ច្រើនសន្ធឹកសន្ធាប់។ ចាប់តាំងពីឆ្នាំ ២០១៧ មក មានត្រីប្រភេទនេះ តែមួយក្បាលប៉ុណ្ណោះដែលត្រូវបានគេរាយការណ៍ថារកឃើញនៅក្នុងតំបន់នេះ។ នៅឆ្នាំនេះវាមានចំនួនច្រើនមែនទែនរហូតដល់ត្រូវគេចាប់យកមកលក់បានរាប់សិបកន្ត្រកនៅទីផ្សារក្នុងស្រុក។ Wonders of the Mekong
