ឈីប A14 Bionic របស់ Apple គឺជាបន្ទះឈីបដំបូងគេផលិតដោយប្រើប្រាស់បច្ចេកវិទ្យា 5nm ហើយវាមិនត្រឹមមានប្រើប្រាស់លើត្រកូល iPhone 12 នោះទេ ប៉ុន្តែក៏មានប្រើប្រាស់លើ iPad Air 4
Apple បានអះអាងថា CPU និង GPU នៃបន្ទះឈីបនេះមានល្បឿនលឿនជាងឈីបរបស់ក្រុមហ៊ុនគូប្រជែងប្រមាណ ៥០% ហើយថែមទាំងអះអាងថាសមត្ថភាពរបស់វាអាចប្រកួតប្រជែងនឹងកុំព្យូទ័រយួរដៃបាន។
បើផ្អែកតាមពិន្ទុធ្វើតេស្តនៅលើ AnTuTu រវាង iPhone 12 និង iPad Air 4 ឃើញថាមានទំហំខុសគ្នាច្រើន។ iPad Air 4 ទទួលបានពិន្ទុសរុបដល់ខ្ទង់ ៦៦ម៉ឺនពិន្ទុ ខណៈដែល iPhone 12 ទទួលបានត្រឹមជាង ៥៦ម៉ឺនពិន្ទុ ខុសគ្នាជិត ១០ម៉ឺនពិន្ទុឯណោះ។
វិបសាយ AnTuTu ជឿជាក់ថាសមត្ថភាពបន្ទះឈីប A14 Bionic ត្រូវបានគេកាត់បន្ថយនៅលើ iPhone 12 ក៏ដោយសារ iPhone 12 មានថ្មទំហំតូចជាងមុន និងដើម្បីទប់ស្កាត់បញ្ហានៃការឡើងកំដៅផងដែរ។
