បាត់ដំបង! ក្រុមការងារដែលដឹកនាំដោយ ឯកឧត្តមនាយឧត្តមសេនីយ៍ គតិបណ្ឌិត ហ៊ីង ប៊ុនហៀង នាយករងខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
បានចុះប្រមូលទិញផ្លែតាង៉ែនពីកសិករដើម្បីសម្រួលការជុញកកស្ទះ ខណៈប្រទេសជិតខាង(ថៃ)មិនអនុញ្ញាតអោយនាំចូលទៅលក់នៅក្នុងទីផ្សារទឹកដីរបស់គេ។
ឯកឧត្តមនាយឧត្តមសេនីយ៍ គតិបណ្ឌិត ហ៊ីង ប៊ុនហៀង ក្នុងឱកាសឈរទទួលទិញផ្លែតាង៉ែននៅក្នុងខេត្តបាត់ដំបង លោកបានលើកឡើងថា÷ ការទទួលទិញកសិផលផ្លែតាង៉ែន ហៅ(មៀនប៉ៃលិន)ពីកសិករនេះជាយុទ្ធសាស្ត្ររបស់សម្តេចតេជោ ហ៊ុន សែន ក្នុងគោលបំណងជួយសម្រួលបញ្ហាកកស្ទះទីផ្សារផ្លែតាង៉ែនរបស់ប្រជាកសិករនៅក្នុងតំបន់ព្រំដែន ពិសេសក្នុងមូលដ្ឋានខេត្តបាត់ដំបង។
ការឈរទិញនេះដែរមិនមានកំណត់រយ:ពេលឡើយ ដោយចាប់ផ្តើមដំបូងពីថ្ងៃទី ១៨ ខែសីហា ឆ្នាំ ២០២១នេះ ក្រុមមន្ត្រីចាំទទួលទិញនៅទីលានទាត់បាល់វាលបែកចាន ខេត្តបាត់ដំបង និងនៅថ្ងៃបន្ទាប់ក្រុមការងារកងអង្គរក្ស និងចុះទៅទិញដោយផ្ទាល់ដល់ចម្ការរបស់កសិករតែម្តងនៅតាមបណ្តាស្រុកជាច្រើននៅតំបន់ព្រំដែន។
ឯកឧត្តម បានបញ្ជាក់បន្តថា÷ ក្រោមការយកចិត្តទុកដាក់ដោយក្តីរលឹក និងឈឺឆ្អាលពីសុខទុក្ខរបស់កសិករ សម្តេចតេជោ បានណែនាំផងដែរឲ្យរៀបចំផ្លែតាង៉ែនដែលទិញពីកសិករទាំងអស់ឲ្យនាំយកទៅផ្តល់ជូនដល់កងកម្លាំងប្រដាប់អាវុធជួរមុខគ្រប់ប្រភេទ មន្ត្រី និងក្រុមគ្រូពេទ្យេជួរមុខ ក៏ដូចជាចែកជូនដល់បងប្អូនប្រជាពលរដ្ឋដែលកំពុងសម្រាកព្យាបាលជំងឺកូវីដ-១៩ នៅតាមមណ្ឌលនានាថែមទៀត។
ជាមួយការទិញថ្ងៃដំបូងនេះដែរក្រុមការងារទទួលទិញផ្លែតាង៉ែនចម្រុះខ្នាតរាប់សិបតោនពីកសិករផង ពីក្រុមឈ្មួញកណ្តាលផង ក្នុងតម្លៃ ២៥០០រៀលក្នុង ១គីឡូក្រាម ខណ:តម្លៃផ្លែតាង៉ែនក្នុងទីផ្សារបច្ចុប្បន្នត្រឹមជាង ១៥០០រៀល ដល់ ១៨០០រៀលក្នុង ១គីឡូក្រាម ៕
