លោក សាយ សុផាត ប្រធានមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន បានផ្តល់កិច្ចសម្ពាសដល់អ្នកសារពត៌មាននាពេលថ្មីៗនេះថា នៅខេត្តប៉ៃលិននឹងគ្រោងបង្កើតបណ្ដុំ ឬសហគមន៍ទុរ៉េនដោយមានឡូហ្គោដូចនៅស្រុកសំឡូត ខេត្តបាត់ដំបង ដែរ ហើយទូទាំងខេត្តប្រជាកសិករបានដាំទុរ៉េនមានចំនួន៤៥ហិកតា និងមានការដាំដុះជាបន្តបន្ទាប់ បើយើងដាំតាមស្តង់ដារនៃការដាំបទដ្ឋានបច្ចេកទេសពី ២០០ ទៅ ២១០ ដើមក្នុងមួយហិកតា។
លោកប្រធានមន្ទីរបានបញ្ជាក់ថា នៅខេត្តប៉ៃលិនមានចំការខ្លះដាំបានលទ្ធផលល្អ ហើយចំការមួយចំនួនទៀតមិនទាន់ទទួលផលល្អនៅឡើយទេ។ ចំពោះដីដែលដាំទុរ៉េនបានផលគឺប្រភេទដីមានទីតាំងខ្ពស់មិនដក់ទឹកហើយកុំដាំឬដក់ទឹកនៅទីទំនាប ធ្វើឲ្យប៉ះពាល់ខ្លាំងដល់ដើមទុរ៉េនមិនបានផលទេ ។
លោកប្រធានមន្ទីរផ្តល់បទពិសោធន៍ខ្លះៗពាក់ព័ន្ធ និងការថែទាំ ភាគច្រើននៅទឹកដីប៉ៃលិននេះច្រើនតែជួបសត្វល្អិតបំផ្លាញដូចជាពពួកពីងពាងប្រហម ឬហៅថាចៃក្រហមនេះវាបំផ្លាញនៅលើស្លឹក និងមានផ្នែកខ្លះផ្សិតនៅលើគល់ហើយបើជួបបែបនេះយើងត្រូវរាយការណ៍មកមន្ត្រីជំនាញដើម្បីប្រើថ្នាំអោយចំគោលដៅពិសេសត្រូវតាមដានជារាងរាល់ថ្ងៃពេលដើមវាអាយុ១០ឆ្នាំឡើងទៅថែទាំគល់កុំឲ្យសើមពេកកុំស្ងួតពេកនិងឲ្យកំដៅថ្ងៃចូលដល់គល់ផង។
ចំណែកកសិករម្នាក់ឈ្មោះ ញ៉ៅ សាគុណ បានរៀបរាប់ឱ្យដឹងថា ៖ រហូតមកដល់ពេលនេះគាត់ចាប់ផ្តើមប្រមូលផលផ្លែទុរ៉េនប្រភេទ (ម៉ុនថង) ដែលជាទុរ៉េន មានរសជាតិផ្អែម ឈ្ងុយឆ្ងាញ់ យកពូជមកពីប្រទេសថៃដាំជាង១០ឆ្នាំមកហើយ គាត់គាំទ្រការផ្តល់បទពិសោធន៍ពីលោកប្រធានមន្ទីរកសិកម្មខេត្តព្រោះកន្លងមកគាត់ជួបបញ្ហាដូចខាងលើមែនតែគាត់ខំព្យាបាលរហូតបានជោគជ័យ។
ចំពោះតំលៃទុរ៉េនវិញក្នុង១គីឡូក្រាម គាត់លក់តម្លៃ២៣០០០រៀល ទៅ២៥០០០រៀល ខណ:រៀងរល់ថ្ងៃ ឈ្មួញកុម្មង់ទិញម្នាក់ៗ ចំនួន១០ទៅ២០គីឡូក្រាម ហើយអ្នកខ្លះទិញចំនួន៣០គីឡូក្រាម ដែលធ្វើឱ្យគាត់មានការសប្បាយរីករាយ ក្នុងការបេះផ្លែទុរ៉េនលក់ឱ្យភ្ញៀវ៕
លោក សាយ សុផាត ប្រធានមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន៖