ខេត្តបាត់ដំបង! ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានមានប្រសាសន៍ថា ជម្ងឺកូវីដធ្វើអោយប្រែប្រួលសេដ្ឋកិច្ចពិភពលោក ហើយក្នុងនោះកម្ពុជាយើងក៏ទទួលឥទ្ធិពល ខេត្តបាត់ដំបងយើងក៏ទទួលឥទ្ធិពលដូចខេត្តដដៃៗទៀតដែរ ជាពិសេសគឺបងៗដែលប្រកបមុខរបរជាមួយនឹងសេវាកម្មទេសចរណ៍នេះតែម្តង ដែលមានទាំងផ្ទះសំណាក់ រមណីយដ្ឋាន អាហារដ្ឋាន និងពិសេសសេវាដឹកជញ្ជូនបានប៉ះពាល់ប្រាក់ចំណូល។
ឯកឧត្តមអភិបាលខេត្តបានមានប្រសាសន៍បែបនេះនៅក្នុងជំនួបសំណេះសំណាល និងនាំយកអំណោយមនុស្សធម៌សម្តេចក្រឡោម ស ខេង និងលោកជំទាវ ញ៉ែម សាខន ស ខេង ចែកជូនដល់បងប្អូនអាជីវករនិងបងប្អូនអ្នករត់ម៉ូតូកង់បី(តុក តុក)សរុបប្រមាណជាជាង ១០០នាក់ ដែលប្រព្រឹត្តធ្វើឡើងនៅល្ងាចថ្ងៃទី០៦ ខែមករា ឆ្នាំ២០២១ នៅបរិវេណសួននាគបាញ់ទឹក ស្ថិតក្នុងសង្កាត់ស្វាយប៉ោ ក្រុងបាត់ដំបង។
បន្ថែមពីនេះឯកឧត្តមក៏បានមានប្រសាសន៍ថា កន្លងទៅរាជរដ្ឋាភិបាល ជាមួយនឹងការស្តាជីវភាព ជាមួយនឹងផលប៉ះពាល់ដោយកូវីដនេះគឺមានគោលនយោបាយច្រើន គោលនយោបាយជាមួយនឹងកម្មករ គោលនយោបាយជាមួយនិងសហគ្រិនធុនតូច គោលនយោបាយជាមួយក្រុមហ៊ុនអចលនទ្រព្យ និងគោលនយោបាយដែលធំធេងមួយទៀត គឺគោលនយោបាយផ្តល់សាច់ប្រាក់ជាមួយពលរដ្ឋ ដែលមានក្រ១ -ក្រ២ ហើយសម្រាប់ខេត្តបាត់ដំបងយើងគឺមានរហូតជាង ៦០០០០គ្រួសារហើយ។
ដោយឡែកចំពោះមុខដែលកើតជំងឺផ្ទុះនៅក្នុងសហគមន៍ក្នុងប្រទេសថៃ ហើយខេត្តបាត់ដំបងជាខេត្តជាប់ព្រំដែន យើងមានធុរៈទទួលបន្ទុកកិច្ចការនេះធំដែលរាជរដ្ឋាភិបាលប្រគល់ភារកិច្ចអោយជួយរ៉ាប់រងនិងទប់ស្កាត់ការរាលដាលនៃជម្ងឺនេះដែលឆ្លងពីប្រទេសជិតខាង ដូច្នេះយើងត្រូវចូលរួមទាំងអស់គ្នា ព្រោះមកដល់ពេលនេះខេត្តបាត់ដំបងយើងមានពលករមកស្នាក់នៅជាង ១០០០នាក់ហើយនៅតាមមណ្ឌលចត្តាឡីស័កចំនួនប្រាំពីរធំៗ មានកំរៀង ,ភ្នំព្រឹក ,សំពៅលូន ,ថ្មគោល ,ក្រុងបាត់ដំបង ,និងស្រុកសង្កែ ដែលរាជរដ្ឋាភិបាលជួយទំនុកបំរុងទាំងស្រុងក្នុងការរៀបចំ គ្រប់គ្រង និងស្នាក់នៅដល់រដ្ឋបាលខេត្តដើម្បីជួយបងប្អូនដែលកំពុងស្នាក់នៅ នៅទីនេះ។
ឯកឧត្តមបន្តទៀតថា ខេត្តបាត់ដំបងជាខេត្តមួយដែលសេដ្ឋកិច្ចពឹងផ្អែកខ្លាំងទៅលើកសិកម្ម ហើយបើទោះបីជាជម្ងឺកូវីដនេះធ្វើអោយប៉ះពាល់សេដ្ឋកិច្ចផ្នែកវិស័យទេសចរណ៍ តែផ្នែកវិស័យកសិកម្មគឺនៅតែដំណើរការដែលពេលនេះប្រជាពលរដ្ឋយើងខ្លះបាននិងកំពុងដាំដុះ ខ្លះបាននិងកំពុងច្រូតកាត់ ពីព្រោះខេត្តបាត់ដំបងយើងរាជរដ្ឋាភិបាលបានវិនិយោគច្រើនទៅលើវិស័យធារាសាស្ត្រ ទើបធ្វើអោយលទ្ធភាពដាំដុះ មានឱកាសដាំដុះបានច្រើនដង ដែលធ្វើអោយសេដ្ឋកិច្ចកសិកម្មរបស់យើងមានដំណើរធម្មតាបើទោះបីមានកូវីដក៏ដោយ លើកលែងតែវិស័យទេសចរណ៍ ទាំងនេះហើយដែលយើងមិនអាចបំភ្លេចបាននៅថ្ងៃជ័យជំនះ៧មករា មានថ្ងៃ៧មករា ទើបយើងមានថ្ងៃនេះ។
គួរបញ្ជាក់ថា អំណោយដែលត្រូវចែកជូនដល់បងប្អូនអាជីវករ ក៏ដូចជាបងប្អូនអ្នករត់ម៉ូតូកង់បី (តុក តុក)នាពេលនេះ ក្នុងមួយនាក់ទទួលបាន - អង្ករ ២០គីឡូក្រាម - ទឹកសុទ្ធ ១កេស -ត្រីខ -សាប៊ូ និងថវិកាចំនួន ៤០០០០រៀល។