ក្រោយជំនន់ទឹកស្ទឹងព្រែកត្នោត បានជន់ឡើងបណ្ដាលឱ្យបាក់ទ្វារទឹក ១កន្លែង កាលពីវេលាម៉ោង ១២:៣០ នាទី យប់រំលងអធ្រាត្រចូលថ្ងៃទី ២៧ តុលា ម្សិលមិញ បានបង្កផលប៉ះពាល់ដល់ប្រជាពលរដ្ឋជាង ១ ០០០ គ្រួសារ។ ទន្ទឹមនឹងនោះ ប្រជាពលរដ្ឋ ៣៥០គ្រួសារ រស់នៅតាមបណ្ដោយ ស្ទឹងព្រែកត្នោត ក្នុងខណ្ឌដង្កោ បានជម្លៀសចេញទៅទីទួលសុវត្ថិភាព។
អភិបាលខណ្ឌដង្កោ លោកស្រី គឹម ញឹប បានថ្លែងថា កម្លាំងសមត្ថកិច្ចកំពុងរូតរះជួសជុលទ្វារទឹកឡើងវិញ និងចាក់ដីរៀបជាខ្នងទំនប់ ដោយគិតមកទល់រសៀលថ្ងៃ ២៧ តុលា សម្រេចប្រមាណ ៨០ ភាគរយហើយ។
យោងតាមទិន្នន័យបឋម ពីអាជ្ញាធរខណ្ឌដង្កោ និងខណ្ឌកំបូល បានបញ្ជាក់ថា ជំនន់ទឹកស្ទឹងព្រែកត្នោត បានបង្កការជន់លិច និងប៉ះពាល់ដល់ប្រជាពលរដ្ឋជាង ១ ០០០ គ្រួសារ គិតត្រឹមរសៀលថ្ងៃទី ២៧ តុលា ម្សិលមិញ ក្នុងនៅសង្កាត់បឹងធំ ខណ្ឌកំបូល ប៉ះពាល់ចំនួន ២១៤ គ្រសារ និងនៅខណ្ឌដង្កោប៉ះពាល់ចំនួន ៨៤១ គ្រួសារក្នុងនោះនៅសង្កាត់ គងនយ ចំនួន ៤៩១ គ្រួសារ និងក្នុងសង្កាត់សាក់សំពៅចំនួន ៣៥០ គ្រួសារ៕