ខេត្តបន្ទាយមានជ័យ ៖ នៅព្រឹកថ្ងៃទី២០ ខែតុលា ឆ្នាំ២០២០នេះ ទំនប់ទឹកអាងអូរខៃដន ត្រូវបានបាក់ បណ្តាលឲ្យទឹកហូរចេញ កាត់ផ្លូវជាតិលេខ៥ និងបង្កផលប៉ះពាល់ កាន់តែធ្ងន់ធ្ងរ សម្រាប់ខេត្តបន្ទាយមានជ័យ ។
ការបាក់នេះ នៅចំណុចប៉ែកខាងជើងទំនប់អាង ជាប់ផ្លូវជាតិលេខ៥ បណ្តាលឲ្យទឹកហូរកាត់ផ្លូវជាតិ ប្រវែងប្រមាណជា ជិត១០០០ម៉ែត្រ ។
នៅព្រឹកនេះដែរគេសង្កេតឃើញមាន វត្តមានក្រុមសមត្ថកិច្ច អាជ្ញាធរ កំពុងនៅកន្លែងកើតហេតុ ដើម្បីចាំជួយប្រជាពលរដ្ឋ និងសម្រួលចរាចរណ៍ ។
ជាមួយគ្នានេះឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានអំពាវនាវ ដល់ប្រជាពលរដ្ឋ សូមមានការ យកចិត្តទុកដាក់ ប្រុងប្រយ័ត្នខ្ពស់បន្ថែមទៀត ពេលធ្វើដំណើរឆ្លងកាត់ បើមានបញ្ហាអ្វីកើតឡើង ត្រូវរាយការណ៍មកកាន់អាជ្ញាធរមូលដ្ឋាន សមត្ថកិច្ចកងកម្លាំងឱ្យបានទាន់ពេលវេលា ៕