លោក Zabiullah Mujahid អ្នកនាំពាក្យចលនាតាលីបង់បានប្រាប់សារព័ត៌មាន Sputnik កាលពីថ្ងៃព្រហស្បតិ៍ថា ក្រុមតាលីបង់បានគ្រប់គ្រងទឹកដីប្រមាណ ៩០ភាគរយនៅតាមព្រំដែនរបស់ប្រទេសអាហ្វហ្គានីស្ថានជាមួយនឹងបណ្តាប្រទេសជិតខាង។
លោក Mujahid បាននិយាយថា «នៅតាមព្រំដែននៃប្រទេសអាហ្វហ្គានីស្ថានជាមួយប្រទេសតាជីគីស្ថាន អ៊ូសបេគីស្ថាន តួកមេនីស្ថាន និងអ៊ីរ៉ង់ - ប្រហែល ៩០ភាគរយនៃព្រំដែន គឺស្ថិតនៅក្រោមការគ្រប់គ្រងរបស់យើង។ ព្រំដែនជាមួយប្រទេសតួកមេនីស្ថាន និងព្រំដែនជាមួយអ៊ីរ៉ង់ ស្ថិតនៅក្រោមការគ្រប់គ្រងរបស់យើងទាំងស្រុង។ ព្រំដែនជាមួយប្រទេសប៉ាគីស្ថាន (លើកលែងតែផ្នែកតូចៗមួយចំនួន) ក៏ស្ថិតនៅក្រោមការគ្រប់គ្រងរបស់យើងដែរ»។
សេចក្តីថ្លែងការណ៍នេះបានធ្វើឡើងបន្ទាប់ពីទីក្រុងមូស្គូបានធ្វើការកត់សម្គាល់កាលពីព្រឹកថ្ងៃព្រហស្បតិ៍ថា ការដកកងទ័ពរបស់សហរដ្ឋអាមេរិកយ៉ាងលឿនចេញពីអាហ្វហ្គានីស្ថាន បានបណ្តាលឱ្យមានការផ្លាស់ប្តូរដ៏ធំមួយ ដោយក្រុមចលនាតាលីបង់បានកាន់កាប់ស្ទើរតែទាំងស្រុងនូវតាមព្រំដែនជាមួយប្រទេសតាជីគីស្ថាន។
ប្រទេសដែលត្រូវបានហែកហួរដោយសង្គ្រាមមួយនេះ បាននិងកំពុងជួបប្រទះនឹងការប៉ះទង្គិចគ្នាយ៉ាងខ្លាំងរវាងក្រុមចលនាតាលីបង់ និងកងកម្លាំងរដ្ឋាភិបាលក្នុងរយៈពេលប៉ុន្មានខែថ្មីៗនេះ។ ក្រុមសកម្មប្រយុទ្ធបានទទួលសន្ទុះនៅពេលកងទ័ពរបស់សហរដ្ឋអាមេរិកចាប់ផ្តើមដកខ្លួនចេញាកាលពីថ្ងៃទី១ ខែឧសភា ស្របតាមកិច្ចព្រមព្រៀងដែលពួកតាលីបង់ និងសហរដ្ឋអាមេរិកសម្រេចបាននៅទីក្រុងដូហា កាលពីខែកុម្ភៈ ឆ្នាំ២០២០ ។
យោងតាមក្រុមតាលីបង់បានឱ្យដឹងថា កងកម្លាំងរបស់ខ្លួនឥឡូវនេះកំពុងគ្រប់គ្រងប្រមាណជិត ៨៥ភាគរយនៃប្រទេសអាហ្វហ្គានីស្ថានហើយ៕