ប្រជាពលរដ្ឋក្នុងខេត្តពោធិ៍សាត់ ចាប់ផ្ដើមចេញទៅរកផ្សិតប៉ក់ក្រោយពេលមានភ្លៀងធ្លាក់ ឋណៈដែរផ្សិតនេះលក់បានតំលៃសមរម្យសម្រួលដល់ជីវភាពគ្រួសាររបស់ប្រជាពលរដ្ឋក្នុងតំបន់នោះ។
កញ្ញា គង់ សាវតា ជាអ្នកទទួលទិញផ្សិតប៉ក់ ឬផ្សិតផូងផាងមកលក់បន្ត ក្នុងភូមិលលកស ឃុំលលកស ស្រុកពោធិ៍សាត់ ខេត្តពោធិ៍សាត់ បានឲ្យដឹងថា ក្រៅពីមុខរបរធ្វើស្រែចម្ការហើយ ឲ្យតែដល់រដូវមានភ្លៀងធ្លាក់ ប្រជាពលរដ្ឋ បាននាំគ្នាចេញទៅដើររកដកផ្សិតប៉ក់នៅតាមតំបន់ព្រៃភ្នំ ដោយក្នុងមួយថ្ងៃអាចរកផ្សិតបានចន្លោះពី២០គីឡូទៅ៣០គីឡូក្រាម ដែលទទួលបានតំលៃពី ៤០,០០០រៀល និង៤៥,០០០រៀល ។
កញ្ញាបានបន្តថា ប្រភេទផ្សិតធម្មជាតិដ៏កម្រមួយនេះ រាងមូល មានដុះតែនៅក្នុងដីដែលមានក្រាលដោយស្លឹកឬដើមឈើងាប់ៗ ហើយនៅពេលមានភ្លៀងធ្លាក់គឺចាប់ផ្តើមដុះ ដែលផ្សិតនេះសំបូរទៅដល់វីតាមីន ប្រូតេអ៊ីនសំខាន់ជួយដល់រាងកាយ ជាពិសេសអាចយកទៅធ្វើជាម្ហូបបានជាច្រើនមុខ និងមានរសជាតិឈ្ងុយឆ្ងាញ់ថែមទៀតផង ។
កញ្ញាបានបញ្ជាក់ថា ផ្សិតប៉ក់នេះជាអាហារពេញនិយមបំផុតរបស់ប្រជាជនថៃ ហើយបានប្រមូលទិញ ជាច្រើនដោយសារតែផ្សិតនេះនៅប្រទេសថៃពិបាករកណាមួយការចូលព្រៃត្រូវបានឃាត់។ ក្រៅពីនេះ នៅមានបន្លែព្រៃជាច្រើនមុខទៀតមានដូចជា ស្លឹកព្រេច ចុងផ្តៅ ដែលប្រជាជនថៃទទួលទិញពីកម្ពុជា៕
ប្រភព៖ ក្រសួងព័ត៌មាន
