សៀមរាប៖ នៅព្រឹកថ្ងៃទី៣០ ខែឧសភា ឆ្នាំ២០២១នេះ មន្ត្រីជាន់ខ្ពស់នៃសមាជិកព្រឹទ្ធសភាប្រចាំភូមិភាគទី៤ ក្នុងដំណើរបាននាំយកអំណោយ ប្រគល់ជូនរដ្ឋបាលខេត្តសៀមរាប ដែលជការបង្ហាញអំពីចំណាប់អារម្មណ៍និងវាយតម្លៃខ្ពស់ ចំពោះបទពិសោធន៍ការងាររបស់ខេត្តមួយនេះ លើយន្តការកាត់ផ្តាច់ខ្សែចម្លងជម្ងឺ នៃព្រឹត្តិការណ៍សហគមន៍២០កុម្ភៈ ក្រោមអធិបតីភាពឯកឧត្តម ទៀ សីហា អភិបាលខេត្តសៀមរាប ស្ថិតនៅរដ្ឋបាលខេត្ត។
ឯកឧត្តម ប៉ុល លឹម ប្រធានក្រុមសមាជិកព្រឹទ្ធសភាប្រចាំភូមិភាគទី៤ បាននាំយកអំណោយមួយចំនួន ទៅប្រគល់ជូនរដ្ឋបាលខេត្តសៀមរាប។ អំណោយទាំងនោះរួមមានទឹកពិសាបរិសុទ្ធ ៥០កេស មីជាតិ ៥០កេស ទឹកត្រិទឹកស៊ីអីវ ៥០យួរ អាល់កុល ៥០លីត្រ ម៉ាស ២ ៥០០ម៉ាស ដោយឡែកក៏មានសៀវភៅកម្រងឯកសារមួយចំនួនផងដែរ សម្រាប់រដ្ឋបាលនៅថ្នាក់ក្រោមជាតិ សិក្សាអនុវត្តន៍។
ឯកឧត្តម មានប្រសាសន៍ថា អំណោយទាំងនេះគឺជាសក្ខីភាពនៃការចូលរួមក្នុងនាមជាមន្ត្រីជាន់ខ្ពស់ក្នុងស្ថាប័ននីតិប្បញ្ញត្តិថ្នាក់កំពូល ជាមួយស្ថាប័ននីតិប្រតិបត្តិនៅថ្នាក់ក្រោមជាតិ ដែលកំពុងអនុវត្តភារកិច្ចតាមតួរនាទីរបស់ខ្លួន លើដំណោះស្រាយនិងវិធានការមួយចំនួន ដែលសង្កត់បន្ទុកយ៉ាងធ្ងន់ធ្ងរ ដោយវិបត្តិកូវីដ-១៩ ។ ឯកឧត្តមប្រធានបញ្ជាក់ថា នេះគឺជាដំណើរបេសកកម្មមួយ ដែលក្រុមសមាជិកព្រឹទ្ធសភាប្រចាំភូមិភាគទី៤ នាំយកអំណោយដូចគ្នានេះ ទៅប្រគល់ជូនរដ្ឋបាលនៃបណ្តាខេត្តផ្សេងទៀតក្នុងតំបន់ ដោយភ្ជាប់ជាមួយនូវការតាមដានអង្កេតមើល អំពីស្ថានភាព បទពិសោធន៍ និងលទ្ធផលប្រតិបត្តិការ ការអនុវត្តវិធានការកាត់ផ្តាច់ខ្សែចម្លងនៃព្រឹត្តិការណ៍សហគមន៍២០កុម្ភៈ និងការរាំងខ្ទប់ ការចម្លងនាំចូលផងដែរ។
យ៉ាងណាក៏ដោយ ក្នុងដំណើរឆ្លងកាត់ព្រំប្រទល់ខេត្តប៉ែកខាងកើត របស់គណៈប្រតិភូ ចេញពីខេត្តកំពង់ធំ ឆ្លងចូលក្នុងខេត្តសៀមរាប ការៀបចំឲ្យមានប៉ុស្ថិត្រួតពិនិត្យសុខភាពបឋម និងចុះឈ្មោះប្រមូលទិន្នន័យអ្នកដំណើរឆ្លងកាត់និងចូលខេត្តសៀមរាប នៅវិទ្យាល័យកំពង់ក្តីនៃស្រុកជីក្រែង គឺជាចំណុចចាប់អារម្មណ៍និងជាមូលដ្ឋានៃការវាយតម្លៃថា នោះគឺជាបទពិសោធន៍ដ៏គំរូ ដែលនាំឲ្យខេត្តសៀមរាប គ្រប់គ្រងបានល្អ និងទប់ស្កាត់បានទាន់ពេលវេលា ការរីករាលដាលនៃជម្ងឺកូ-វីដ១៩ក្នុងសហគមន៍។
អភិបាលខេត្តសៀមរាប ( ឯកឧត្តម ទៀ សីហា ) ក៏បានបន្ថែមនូវការបង្ហាញជូនផងដែរថា មកដល់ពេលនេះ ខេត្តសៀមរាបកំពុងមានដំណើរការប៉ុស្ថិត្រួតពិនិត្យសុខភាពបឋម និងប្រមូលទិន្នន័យអ្នកដំណើរចំនួន៣ច្រកធំៗ គឺ សៀមរាប-កំពង់ធំ សៀមរាប-ឧត្តរមានជ័យ និង សៀមរាប-បន្ទាយមានជ័យ ហើយជាមធ្យមប្រចាំថ្ងៃ មានអ្នកដំណើរចូល និងឆ្លងកាត់ខេត្តសៀមរាប មានប្រមាណជា ៧ពាន់នាក់។ ឯកឧត្តមបញ្ជាក់ថា ទិន្នន័យនៅក្នុងដៃទាំងនោះហើយ គឺជាការកសាងលទ្ធភាព និងបង្កើនប្រសិទ្ធភាពមធ្យោបាយគ្រប់គ្រងការផ្ទុះជម្ងឺ និងតាមដានជនសង្ស័យដែលពាក់ព័ន្ធ បញ្ជូនធ្វើចត្តាឡីស័ក យកសំណាកវិភាគ និងចាត់វិធានការទប់ស្កាត់ការចម្លងបន្តផងដែរ ដែលក្នុងនោះ ប្រជាពលរដ្ឋខេត្តសៀមរាប មានស្មារតីចូលរួម ប្រុងប្រយ័ត្ន ដោយចាប់ផ្តើមពីបុគ្គលម្នាក់ ពង្រីកទៅកាន់ក្រុមគ្រួសារ និងសហគមន៍ អនុវត្តវិធានការ ៣ការពារ និង ៣កុំ របស់ប្រមុខនៃរាជរដ្ឋាភិបាល ៕ ដោយ តាំង ហូ