ក្រសួងទេសចរណ៍ នឹងស្នើសុំប្រមុខរាជរដ្ឋាភិបាល បើកតំបន់ទេសចរណ៍ ក្នុងត្រីមាសទី៤ ឆ្នាំ២០២១
ក្រសួងទេសសចរណ៍ ស្នើសុំបើកទេសចរណ៍ ក្នុងត្រីមាសទី៤ ឆ្នាំ២០២១ ដោយផ្តោតអាទិភាព ជំហានទី១ នៅខេត្តសៀមរាប-អង្គរ និងសង្កត់ធ្ងន់លើយុទ្ធសាស្ត្រទាក់ទាញ ទីផ្សារទេសចរណ៍ដែលមានហានិភ័យកូវីដ-១៩ ទាប ឬដែលមានការគ្រប់គ្រងការកូវីដ-១៩បានល្អ ឬទីផ្សារដែលស្ថិតក្នុងតំបន់ព័ណ៌បែតង។
ក្រសួងទេសចរណ៍ គ្រោងនឹងដាក់ឯកសារទស្សនាទាននេះ ដើម្បីពិគ្រោះយោបល់ល្អិតល្អន់បន្ថែម ជាមួយវិស័យឯកជន នៅថ្ងៃព្រហស្បតិ៍សប្តាហ៍នេះ នឹងដាក់ក្នុងរបៀបវារៈប្រជុំ ដើម្បីស្នើសុំយោបល់ និងកិច្ចសហការពីសំណាក់អន្តរស្ថាប័ន នៅសប្តាហ៍ក្រោយ មុនស្នើសុំសេចក្តីសំរេច ពីរាជរដ្ឋាភិបាល ដឹកនាំដោយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
យោងតាមហ្វេសបុក ក្រសួងទេសចរណ៍ ឱ្យដឹងថា កាលពីថ្ងៃទី២៤ ខែឧសភា ឆ្នាំ២០២១ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានដឹកនាំកិច្ចប្រជុំចង្អៀត តាមប្រព័ន្ធវីដេអូ (Video Conference) ពិភាក្សាសម្រេច លើឯកសារទស្សនាទាន ស្តីពីកញ្ចប់ទស្សនកិច្ចទេសចរណ៍វ៉ាក់សាំងកូវីដ-១៩។
អង្គប្រជុំបានឯកភាព និងសម្រេចដាក់ចេញនូវផែនការ សកម្មភាពអាទិភាពមួយចំនួន«រួមមានការរៀបចំស្នើសុំបើកទេសចរណ៍ ជាបណ្តើរៗក្នុងត្រីមាសទី៤ ឆ្នាំ២០២១ ដោយផ្តោតអាទិភាព ការអនុវត្តគម្រោងក្នុងជំហានទី១ នៅខេត្តសៀមរាប-អង្គរ និងសង្កត់ធ្ងន់ លើយុទ្ធសាស្ត្រទាក់ទាញ ទីផ្សារទេសចរណ៍ ដែលមានហានិភ័យកូវីដ-១៩ ទាប ឬដែលមានការគ្រប់គ្រងការកូវីដ-១៩បានល្អ ឬទីផ្សារដែលស្ថិតក្នុងតំបន់ព័ណ៌បែតង»។
សូមជំរាបថា គម្រោងសាកល្បង នៃការបើកទេសចរណ៍ ជាបណ្តើរៗនេះនឹងផ្តោតលើ ការកសាងទំនុកចិត្តសម្រាប់ទេសចរ (Build Trust and Confident) ,ការសម្រួលការធ្វើដំណើរ (Travel Facilitation) ដោយគម្រោងស្នើសុំលើកលែងលក្ខខណ្ឌ នៃការធ្វើចត្តាទ្បីស័កទាំងស្រុង ចំពោះទេសចរអន្តរជាតិ ដែលបានចាក់វ៉ាក់សាំងហើយ ចេញពីទីផ្សារបៃតង, និង ការសម្រួលតម្លៃកញ្ចប់ទស្សនកិច្ចសមរម្យ ដើម្បីធានាការប្រកួតប្រជែងក្នុងតំបន់៕
