ក្រុមហ៊ុនប្រេងរដ្ឋឥណ្ឌូនេស៊ីឈ្មោះ Pertamina បានឱ្យដឹងថា ខ្លួនកំពុងព្យាយាមគ្រប់គ្រងអគ្គិភ័យដ៏ធំមួយនៅឯរោងចក្រចម្រាញ់ប្រេងរបស់ខ្លួនដែលជាមធ្យមក្នុងមួយថ្ងៃ អាចផលិតប្រេងបានប្រមាណជា ១២៥,០០០ បារ៉ែល មានទីតាំងស្ថិតនៅក្នុងខេត្ត Java ភាគខាងលិចនៃប្រទេសឥណ្ឌូនេស៊ី។ នេះបើយោងតាមការចុះផ្សាយរបស់សារព័ត៌មាន CNA នៅព្រឹកថ្ងៃទី២៩ ខែមីនា ឆ្នាំ២០២១។
ប្រព័ន្ធផ្សព្វផ្សាយបានរាយការណ៍ថាអគ្គិភ័យបានផ្តើមឆេះតាំងពីពាក់កណ្តាលយប់ថ្ងៃអាទិត្យ ហើយបានបន្តឆេះរហូតដល់ព្រឹកថ្ងៃចន្ទ ដោយវីដេអូបានចែកចាយលើបណ្តាញសង្គមបង្ហាញពីអណ្តាតភ្លើងយ៉ាងធំដែលព័ទ្ធជុំវិញរោងចក្រចម្រាញ់ប្រេង និងបណ្តាលឱ្យមនុស្ស ៥នាក់រងរបួស ប្រជាជនចំនួន ៩៥០ នាក់ដែលនៅក្បែរនោះត្រូវបានជម្លៀសចេញ។
មូលហេតុនៃអគ្គិភ័យនេះមិនទាន់ត្រូវបានគេដឹងនៅឡើយទេប៉ុន្តែក្នុងកំឡុងពេលកើតហេតុមានភ្លៀងធ្លាក់ខ្លាំងនិងរន្ទះបាញ់ ហើយខណៈនេះមនុស្ស ៥នាក់កំពុងត្រូវបានព្យាបាលនៅក្នុងមន្ទីរពេទ្យដោយសារការរលាក៕