ក្រសួងដឹកជញ្ជូនឥណ្ឌូណេស៊ី បានឱ្យដឹងនៅថ្ងៃទី១០ ខែមករា ឆ្នាំ២០២១ ថា នាវាទ័ពជើងទឹកបានរកឃើញសញ្ញាយន្តហោះដែលបានធ្លាក់ចូលក្នុងសមុទ្រជ្វា កាលពីម្សិលមិញ ប៉ុន្តែមិនបានបញ្ជាក់ថា វាប្រអប់ខ្មៅឬយ៉ាងណាទេ។
ក្រុមអ្នកមុជទឹក ក៏បានរកឃើញ និងស្រង់បំណែកយន្តហោះនោះគឺចេញពីជម្រៅក្រោមទឹក ២៣ម៉ែត្រ។
សូមជម្រាបថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ឥណ្ឌូណេស៊ី Sriwijaya ដែលដឹកមនុស្ស៦២នាក់ បានធ្លាក់ចូលក្នុងសមុទ្រជ្វា កាលពីថ្ងៃទី៩ ខែមករា ឆ្នាំ២០២១ បន្ទាប់ពីហោះចេញពីក្រុងហ្សាកាតា ឆ្ពោះទៅកាន់ក្រុងPontianak ដែលស្ថិតនៅលើកោះប៊័រណេអូ។ យន្តហោះនេះអាចនឹងធ្លាក់ក្នុងសមុទ្រនៅចន្លោះកោះ Laki និង Lancang ក្នុងតំបន់មួយដែលគេស្គាល់ថា កោះរាប់ពាន់ (Thousand Islands) ស្ថិតនៅប៉ែកពាយព្យនៃក្រុងហ្សាកាតា។
បើតាមប្រធានភ្នាក់ងារស្រាវជ្រាវ និងសង្គ្រោះឥណ្ឌូណេស៊ី លោក Bagus Puruhito បានឱ្យដឹងនៅថ្ងៃនេះថា ក្រុមរបស់លោកបានរកឃើញ កាបូបពីរដែលស្រង់ចេញពីសមុទ្រនេះផងដែរ។ កាបូបទីមួយមានផ្ទុកនូវទ្រព្យសម្បត្តិ និងខោអាវរបស់អ្នកដំណើរ និងកាបូបមួយទៀតមានផ្ទុកសាកសពមនុស្ស។ តែយ៉ាងណា គេកំពុងពិនិត្យបន្ថែមទៀតចំពោះកាបូបនេះ៕