ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើឱ្យភាគីចិន ពិនិត្យសំណើសុំនាំចូលផលិតផលមៀនប៉ៃលិន ម្រេច ធុរ៉េន ក្រូចថ្លុង ទឹកមាត់ត្រចៀកកាំ និងផលិតផលផ្សេងទៀតរបស់កម្ពុជា បន្ទាប់ពីចិនបានយល់ព្រមឱ្យធ្វើការនាំចេញផ្លែស្វាយស្រល់ពីកម្ពុជាទៅកាន់ប្រទេសចិន។
ការស្នើនេះធ្វើឡើងក្នុងពិធីចុះហត្ថលេខាលើពិធីសារស្តីពី “លក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ពីកម្ពុជាទៅកាន់សាធារណរដ្ឋប្រទេសចិន” រវាងក្រសួងកសិកម្ម រុក្ខាប្រមាញ់ និងនេសាទកម្ពុជា និងអគ្គរដ្ឋបាលគយចិន ធ្វើឡើងរវាងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាមួយឯកឧត្តម Wang Wentain ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំនៅកម្ពុជា កាលពីថ្ងៃទី០៩ ខែមិថុនា ម្សិលមិញ។
ឯកឧត្តម វេង សាខុន បានអបអរសាទរចំពោះសមិទ្ធផលថ្មីមួយទៀតដែលអគ្គនាយកដ្ឋានកសិកម្ម និងអគ្គរដ្ឋបាលគយចិន រួមជាមួយភាគីពាក់ព័ន្ធដែលបានធ្វើឱ្យសម្រេចបានក្នុងការនាំចេញផ្លែស្វាយស្រស់ពីកម្ពុជានៅកាន់ទីផ្សារប្រទេសចិន។
ឯកឧត្ដមរដ្ឋមន្ដ្រីបានបន្ថែមថា ចំពោះវិស័យកសិកម្ម រដ្ឋាភិបាលចិនបានសម្រេចបង្កើនកូតានាំចូលអង្ករកម្ពុជាដល់៤០ម៉ឺនតោនក្នុងមួយឆ្នាំ ហើយជិតពីរឆ្នាំកន្លងមកនេះបានអនុញ្ញាតឱ្យកម្ពុជានាំចេញចេកអំបូងលឿងដោយត្រង់ទៅកាន់ទីផ្សារចិនដែលត្រូវការ ៨លានតោនក្នុង១ឆ្នាំ។
ឯកឧត្ដមបានអះអាងថា កម្ពុជា និងចិនបាននិងកំពុងពិភាក្សាអំពី នីតិវិធីនិងលក្ខខណ្ឌតម្រូវ និងបច្ចេកទេសមួយចំនួនដើម្បីឈានទៅធ្វើការអនុម័តលើឯកសារសំណើនាំចេញ ម្រេច មៀនប៉ៃលិន ក្រូចថ្លុង ធុរ៉េន និងទឹកមាត់ត្រចៀកកាំ ហើយកិច្ចការនេះនឹងអាចចាប់ផ្តើមធ្វើការនាំចេញនាពេលឆាប់ៗខាងមុខនេះ។
ជាការឆ្លើយតប ឯកឧត្តម Wang Wentain ឯកអគ្គរដ្ឋទូត នៃសាធារណរដ្ឋប្រជាមានិតចិតប្រចាំនៅកម្ពុជាបានវាយតម្លៃខ្ពស់ចំពោះសមិទ្ធផលនេះ និងបានលើកឡើងពីកិច្ចសហប្រតិបត្តិការរវាងប្រទេសទាំងពីលើគ្រប់វិស័យ។
ឯកឧត្ដមបន្ដទៀតថាការនាំចេញកសិផលកម្ពុជាទៅកាន់ទីផ្សារចិននាពេលនេះ ប្រាកដជានឹងជួយសេដ្ឋកិច្ចកម្ពុជាដែលទទួលរងនូវជំងឺឆ្លងសកលកូវីដ-១៩ ឱ្យមានកំណើនប្រសើរឡើង វិញក្នុងពេលឆាប់ៗ ខណ:ដែលវិស័យកាត់ដេរកំពុងមានការធ្លាក់ចុះគួរឱ្យកត់សម្គាល់៕
