ឯកឧត្តម វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ បានបង្ហាញចំណាប់អារម្មណ៍ និងកោតសរសើរ ទាក់ទងនឹងការអភិវឌ្ឍវិស័យកសិកម្មទូទាំងខេត្តកំពង់ចាម ជាពិសេសការប្រើប្រាស់គ្រឿងយន្ត ស្របពេលដែលកំលាំងពលកម្មទាំងមនុស្ស និងសត្វបានធ្លាក់ចុះគួរឱ្យកត់សម្គាល់។
ថ្លែងក្នុងឱកាសចូលរួមសកម្មភាពធ្វើស្រែបង្ហាញដោយប្រើគ្រឿងយន្ត និងឧបករណ៍សម្រាប់ បម្រើឱ្យវិស័យផលិតកម្មស្រូវ នៅភូមិផ្តៅជុំកើត ឃុំផ្តៅជុំ ស្រុកជើងព្រៃ ខេត្តកំពង់ចាម កាលពីថ្ងៃទី០៤ ខែមិថុនា ម្សិលមិញ ឯកឧត្តមរដ្ឋមន្ត្រី បានបញ្ជាក់ថា សមិទ្ធផលនាថ្ងៃនេះ ស្តែងចេញពីការខិតខំប្រឹងប្រែង និងយកចិត្តទុកដាក់ខ្ពស់បំផុតរបស់រាជរដ្ឋាភិបាល ក្នុងការដាក់ចេញនូវគោលនយោបាយជំរុញកំណើនផលិតកម្មកសិកម្មដើម្បីជួយទ្រទ្រង់កំណើនសេដ្ឋកិច្ច តាមរយ:ការធានាបាននូវសន្តិសុខស្បៀង អាហារូបត្ថម្ភ និងជំរុញការនាំចេញ ដោយការប្រើប្រាស់បច្ចេកវិទ្យាកសិកម្មទំនើបទាន់ សម័យធានាបាននូវប្រសិទ្ធភាពសេដ្ឋកិច្ច បរិយាប័ន នរវានុវត្តន៍ និងការប្រែប្រួលអាកាសធាតុ។
សូមជម្រាបថា បច្ចុប្បន្ន ផលិតកម្មស្បៀងរបស់ប្រទេសកម្ពុជា ដែលបាននឹងកំពុងនាំចេញយ៉ាងសស្រាក់សស្រាំ នាពេលបច្ចុប្បន្ន រួមមាន៖ ស្រូវ អង្ករ ដំឡូងមីស្រស់ និងក្រៀម គ្រាប់ស្វាយចន្ទីស្រស់ ផលិតផលសម្រេច និងស្វាយស្រស់៕