ខេត្តសៀមរាប ÷ដីព្រៃលិចទឹកនៅចំណុច ត្រពាំងឆ្តោ ខាងក្រោម ទំនុប ៧៨ ប្រហែល១០០ម៉ែត ស្ថិតក្នុងឃុំសំរោងយា ស្រុកពួក ខេត្តសៀមរាប កំពុងរងនូវការឈូសឆាយ និងទន្ទ្រានកាន់កាប់ដោយខុសច្បាប់ ពីសំណាក់ឈ្មួញអ្នកមានលុយនិងមានអំណាច ។
សេចក្ដីរាយការណ៍មកថា ឈ្មួញជនខិលខូច បានឆក់ឱកាសខណៈពេលអាជ្ញាធរ ក៏ដូចជារាជរដ្ឋាភិបាលកំពុងមមាញឹកក្នុងការប្រយុទ្ធប្រឆាំងនឹងជំងឺគូ 19 ពួកគេយកគ្រឿងចក្រ ចូលទៅ លួចឈូសឆាយនិងទន្ទ្រានដីព្រៃលិចទឹក ដែនជាជម្រកមច្ឆាជាតិ ពងកូននៅរដូវវស្សា នោះជាសហគមន៍កែវពណ៌ ជាប់មាត់បឹងទន្លេសាប ឈ្មួញទន្ទ្រានអស់ទំហំ ប្រហែល ១០ ហិកតា ទៅ១៤ហិកតា ដោយពុំមានអាជ្ញាធរ និងមន្ត្រីជំនាញចុះទៅទប់ស្កាត់ និងបង្ក្រាបនៅឡើយទេ ។
ប្រជាពលរដ្ឋជាច្រើនគ្រួសារ ដែលរស់នៅប្រកបមុខរបរធ្វើស្រែ នៅទីនោះ ពួកគាត់អះអាងថា សង្កេតឃើញក្រុមឈ្មួញ អ្នកមានលុយ មានអំណាចមួយក្តាប់តូច ដែលតែងតែយកគ្រឿងចក្រ មកឈូសឆាយ ទន្ទ្រានយកដីធ្វើជាកម្មសិទ្ធនោះ គឺកើតមានតែរហូតមកហើយ ។
ចំពោះការរំលោភឈូសឆាយដីព្រៃលិចទឹក ដែលជាជម្រកត្រីពងកូននោះ ប្រជាពលរដ្ឋ សូមអំពាវនាវ ដល់អាជ្ញាធរគ្រប់លំដាប់ថ្នាក់ សូមមេត្តាជួយ មានវិធានការ ការពារនិងទប់ស្កាត់ ទាន់ពេលវេលា ។ ជុំវិញរឿងរ៉ាវ ខាងលើនេះផងដែរ អ្នកយកព័ត៌មានយើង បានទំនាក់ទំនងទៅលោក ទា គឹម សុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប លោក បានប្រាបថាលោក អោយ មន្ត្រីក្រោមឱវាទរបស់ខ្លួនចុះទៅពិនិត្យ និងវែករកមុខសញ្ញាជនដែលបង្កដើម្បីយកមកផ្តន្ទាទោសតាមច្បាប់ ។ ដោយ តាំង ហូ