ជំនន់ទឹកស្ទឹងព្រែកត្នោត គិតត្រឹមថ្ងៃទី ២៦ ខែ តុលា ឆ្នាំ ២០២១ ម្សិលមិញ បានជន់លិចប៉ះពាល់ផ្ទះប្រជាពលរដ្ឋប្រមាណជាង ៦០០ ខ្នង នៅក្នុងភូមិសាស្ត្រខណ្ឌកំបូល និង ខណ្ឌដង្កោ។ នេះបើតាមរបាយការណ៍បឋម ពីអាជ្ញាធរមូលដ្ឋាន។
លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា ស្ថានភាពទឹកស្ទឹងព្រែកត្នោត បានជន់ឡើងយ៉ាងគំហុក បណ្ដាលឱ្យទឹកលិចហូរកាត់លើកំណត់ផ្លូវលេខ ២០ និង លេខ ១០៤ ដែលតម្រូវឱ្យរដ្ឋបាលរាជធានីភ្នំពេញ សម្រេចបិទចរាចរណ៍ឆ្លងកាត់ផ្លូវទាំង២ខ្សែនេះជាបណ្ដោះអាសន្នចាប់ពីចំណុចរង្វង់មូលកួរស្រូវ ដល់ផ្សារកំពង់កន្តួតដើម្បីការពារផលប៉ះពាល់និងខូចខាតផ្លូវធ្ងន់ធ្ងរ និងដើម្បីការពារសុវត្ថិភាពអ្នកធ្វើដំណើរ។
លោកបានថ្លែងថាក្នុងខណៈនេះ ទឹកបានស្រកចុះបន្តិចវិញ ប៉ុន្តែសមត្ថកិច្ចយើងនៅមិនទាន់អនុញ្ញាតឱ្យរថយន្តដឹកទំនិញធំៗបើកឆ្លងកាត់នោះទេ ព្រោះបារម្ភខូចខាតផ្លូវ នៅចំណុចដែលទឹកកំពុងហូរកាត់នេះ៕
