(ត្បូងឃ្មុំ)៖នៅថ្ងៃសុក្រទី១០ ខែមិថុនា ឆ្នាំ២០២២ ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងលោកជំទាវ ម៉េង វ៉ាន់ដានីន ព្រមទាំងមន្រ្តីរាជការជុំវិញខេត្ត អញ្ជើញក្រុងពាលីនៅទីទួលទុំទាវសុំម្ចាស់ទឹកម្ចាស់ដីកសាងអាស្រមអ្នកតាក្រហម ក និងរបងស្ថិតនៅភូមិ ពោធិ៍ជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ។
ឯកឧត្ដមបណ្ឌិតមានប្រសាសន៍ថារឿងទុំទាវ គឺជារឿងប្រលោមលោកសោកនាដកម្មបែបមនោសញ្ចេតនា ដែលនិពន្ធដោយភិក្ខុ ងួនសោម ដែលសរសេរអំពីស្នេហាប្រកាន់វណ្ណៈ នាសម័យកាលលង្វែក ក្នុងគ.ស ១៥៧២ រជ្ជកាលព្រះបាទ បរមរាជាទី២ ។ ស្នាដៃនិពន្ធរបស់ ភិក្ខុ ងួនសោម ត្រូវបានព្រះបាទសុីសុវត្ថិ ដាក់បញ្ចូលជាស្នាដៃអក្សរសិល្ប៍ជាតិ ឆ្នាំ១៩២៨ ដែលរៀបជាពាក្យកាព្យ ១០៥០ ល្បះ ដោយស្មើនិង ១១៨ ទំព័រ ។ ស្នាដៃនិពន្ធរបស់លោក ត្រូវបានទទួលស្គាល់ដោយអ្នកនិពន្ធអន្តរជាតិ ប្រដូចទៅនិងរឿងប្រឡោមលោកដ៏ល្បីរបស់អុឺរ៉ុប គឺរឿង "រ៉ូមេអូ និង ជូលីអេត" និង ប្រឡោមលោកដ៏ល្បីរបស់ចិន គឺរឿង ដែលមានតួអង្គឈ្មោះ "លាំងសុឺបុិ និង ជូអិញថាយ"
ឯកឧត្ដមបណ្ឌិតបានបន្តអោយដឹងទៀតថា សម្តេចតេជោបាននាំមកនូវសុខសន្តិភាព និងការអភិវឌ្ឍន៍លើគ្រប់វិស័យ ដោយបានគូសបញ្ជាក់ថា បើមិនមានសន្តិភាព ក៏គ្មានការអភិវឌ្ឍន៍ដែរ។បានជាថ្ងៃនេះទីទួលប្រវត្តិសាស្រ្តទុំទាវបានរៀបចំពីធីសែនក្រុមពាលីកសាងអាស្រមអ្នកតាក្រហម ក និងរបងដើម្បីអភិរក្សទុកសម្រាប់គោលដៅទេសចរណ៍ និងជាកេរដំណែល តកូន តចៅទៅមុខទៀត។
ឯកឧត្ដមបណ្ឌិត សូមណូមពរដល់បងប្អូនប្រជាពលរដ្ឋជួយថែរក្សាទីទួលទុំទាវទាំងអស់គ្នា ដើម្បីយើងទាំងអស់គ្នា កូនចៅយើងទាំងអស់គ្នា។
