ខេត្តបាត់ដំបង៖ អាជ្ញាធរនៃរដ្ឋបាលខេត្តបាត់ដំបងត្រៀមរៀបចំព្រឹត្តិការណ៍សង្ក្រាន្តឆ្នាំថ្មីដើម្បីបម្រើការកម្សាន្តរបស់ប្រជាពលរដ្ឋក្នុងខេត្ត និងភ្ញៀវទេសចរណ៍ក្នុងឱកាសពិធីបុណ្យចូលឆ្នាំថ្មីប្រពៃណីខ្មែរខាងមុខនេះ។
យោងតាមកិច្ចប្រជុំជាមួយថ្នាក់ដឹកនាំតាមបណ្តាស្ថាប័ន មន្ទីរអង្គភាពនានាជុំវិញខេត្តកាលពីចុងសប្តាហ៍កន្លងទៅ អាជ្ញាធរនៃរដ្ឋបាលខេត្តបាត់ដំបងបានត្រៀមរៀបចំព្រឹត្តិការណ៍សង្ក្រាន្តឆ្នាំថ្មីដើម្បីបង្កបរិយាកាសនិងការកម្សាន្តសប្បាយជូនប្រជាពលរដ្ឋនៅក្នុងខេត្តនិងបណ្តាភ្ញៀវទេសចរដែលបានមកធ្វើទស្សនាចរនិងដើរកម្សាន្តលេងនៅក្នុងខេត្តរយៈអំឡុងពេល០៣ថ្ងៃ នៃឱកាសប្រារព្វពិធីបុណ្យចូលឆ្នាំថ្មីប្រពៃណីជាតិខ្មែរខាងមុខឆាប់ៗនេះ។
ក្នុងកិច្ចប្រជុំដឹកនាំដោយឯកឧត្តម សុខ លូ អភិបាលខេត្តបាត់ដំបង គឺក្នុងគោលបំណងដោយផ្តោតសំខាន់ដើម្បីរៀបចំនូវព្រឹត្តការណ៍សង្ក្រាន្តឆ្នាំថ្មីក្នុងខេត្តឡើងវិញក្រោយពីមានការខកខានរយៈពេលប៉ុន្មានឆ្នាំកន្លងមកនេះដោយសារតែការឆ្លងរាតត្បាតដោយជំងឺកូវីដ19 ហើយបើទោះបីពេលវេលាខ្លី មិនអំណោយផលក្នុងការរៀបចំឲ្យមានលក្ខណៈធំដុំដូចសង្ក្រាន្តឆ្នាំដែលយើងមិនទាន់ជួបវិបត្តិនៃការរាតត្បាតពីកូវីដក៏ពិតមែន តែវាបានបង្ហាញពីការយកចិត្តទុកដាក់ពីប្រមុខនៃរាជរដ្ឋាភិបាលកម្ពុជា ដែលបានណែនាំជម្រុញនិងអនុញ្ញាតឲ្យរដ្ឋបាលរាជធានី-ខេត្តនីមួយៗ ឲ្យមានការរៀបចំនូវសង្ក្រាន្តឆ្នាំថ្មីក្នុងខេត្តរបស់ខ្លួនឡើងវិញ ក្រោយពីវិបត្តិនៃការរាតត្បាតពីជំងឺកូវីដ-19 មានការថមថយធូរស្រាល ហើយប្រជាពលរដ្ឋចេះរស់នៅតាមបែបគន្លងថ្មីជាមួយបរិបទនៃជំងឺកូវីដ-19។
ក្នុងកិច្ចប្រជុំនេះដែរ ឯកឧត្តមអភិបាលខេត្ត បានកំណត់ដាក់ចេញនូវផែនការរៀបចំសង្ក្រាន្តក្នុងខេត្តដោយបានប្រគល់ឲ្យមន្ទីរជំនាញពាក់ព័ន្ធដូចជាមន្ទីរវប្បធម៌ មន្ទីរធម្មការ មន្ទីរទេសចរណ៍ មន្ទីររៀចំដែនដី មន្ទីរអប់រំ អង្គភាពអគ្គីសនីខេត្ត និងបណ្តាមន្ទីរអង្គភាពសំខាន់ៗមួយចំនួនទៀតធ្វើការសិក្សាពិភាក្សាដើម្បីត្រៀមខ្លួនក្នុងការរៀបចំនូវកិច្ចដំណើរការនៅក្នុងការរៀបចំសង្ក្រាន្តឆ្នាំថ្មីក្នុងខេត្តបាត់ដំបង បានប្រព្រឹត្តទៅបានរលូន និងបម្រើដល់ការកម្សាន្តរបស់បងប្អូនប្រជាពលរដ្ឋ និងភ្ញៀវទេសចរដែលបានមកស្នាក់នៅនិងដើរកម្សាន្តក្នុងខេត្ត បានសប្បាយនៅក្នុងឱកាសប្រារព្វនូវពិធីបុណ្យចូលឆ្នាំថ្មីប្រពៃជាតិខ្មែរដែលមានរយៈពេល០៣ថ្ងៃដើម្បីទទួលទេវតាឆ្នាំថ្មីឆ្នាំ២០២២និងឲ្យមានការរៀបចំ"ពូនភ្នំខ្សាច់" នៅក្នុងបរិវេណអគារបុរាណសាលាខេត្តចាស់។
ព្រមជាមួយការប្រគុំតន្ត្រីសម័យខ្នាតយក្សនៅតាមសួននាគបាញ់ទឹកមុខមន្ទីរប្រៃសណីយ៍ខេត្តការរៀបចំឲ្យមានការដាក់តាំងពិព័ណ៌ផលិតផលផ្សេងៗនៅតាមផ្លូវភ្លោះក្រោយវត្តដំរីស ការសំដែងសិល្បៈនិងរបាំប្រពៃណី នៅសួននាគសន្តិភាព ការលេងល្បែងប្រជាប្រីយ៍ខ្មែរ វ៉ៃឆ្នាំង ទាញព្រ័ត្រ នៅតាមបណ្តាសាលារៀន ក្នុងក្រុង និង នៅបរិវេណវត្តដំរីសជាដើម ។ល។ ហើយនៅតាមដងផ្លូវទីប្រជុំជននិងស្ពានឆ្លងស្ទឹងសង្កែ និងនៅតាមសួនច្បារអមមាត់ស្ទឹងសង្កែក៏មានការរៀបចំតុបតែងរំលេចនូវភ្លើងចំរុះពណ៌នៅទីនោះផងដែរ។
ក្នុងការរៀបចំឲ្យមានសង្ក្រាន្តឆ្នាំថ្មីនៅថ្ងៃខាងមុខនេះ ឯកឧត្តម សុខ លូ អភិបាលខេត្តបាត់ដំបង ក៏បានផ្តោតការយកចិត្តទុកដាក់ និងក្រើនរំលឹកដល់មន្ទីរសុខាភិបាលនិងអាជ្ញាធរក្រុងនិងមូលដ្ឋានគ្រប់ថ្នាក់ក្នុងខេត្ត ត្រូវជម្រុញកិច្ចសហការរៀបចំនេះជាមួយរដ្ឋបាលខេត្តនិងមន្ទីរជំនាញពាក់ព័ន្ធនិងកងកម្លាំងទាំងអស់ ដើម្បីឲ្យការរៀបចំ និងការប្រព្រឹត្តទៅកម្មវិធីសង្ក្រាន្តនិងពិធីបុណ្យចូលឆ្នាំថ្មីខាងមុខនេះរក្សាបាននូវសុខសុវត្ថិភាពនិងសណ្តាប់ធ្នាប់សង្គមឲ្យបានល្អ។ ក្នុងនោះក៏ត្រូវធ្វើការអប់រំណែនាំប្រជាពលរដ្ឋដែលមកកម្សាន្តនិងដើរលេង ត្រូវតែប្រកាន់ខ្ជាប់នូវវិធានការណែនាំរបស់ក្រសួងសុខាភិបាលឲ្យបានខ្ជាប់ខ្ជួននូវក្នុងការបង្ការការឆ្លងរីករាលដាលពីជំងឺកូវីដ-19ដោយមិនត្រូវភ្លេចខ្លួនជាដាច់ខាតនូវ វិធានការសុខាភិបាល ៣.ការពារ និង ៣.កុំ គឺ៖ធ្វើយ៉ាងណាធានាឲ្យបាននូវសុខុមាលភាពខ្លួនយើងម្នាក់ៗ និង ភ្ញៀវទេសចរដែលមកកម្សាន្តមិនឲ្យមានផលប៉ះពាល់ពីបញ្ហាកូវីដ-19ក្រោយមកទស្សនានិងកម្សាន្តនៅក្នុងខេត្តបាត់ដំបង យើងនោះទេ៕
