អភិបាលខេត្តព្រះសីហនុ អញ្ជើញបើកយុទ្ធនាការផ្សព្វផ្សាយប័ណ្ណព័ត៌មាន ប្រមូលសំរាម តាមដងផ្លូវ៤៧ខ្សែ

ថ្ងៃអាទិត្យ 24 តុលា 2021, 9:43

កាលពីព្រឹកថ្ងៃសៅរ៍ ២រោច ខែអស្សុជ ឆ្នាំឆ្លូវ ត្រីស័ក ព .ស ២៥៦៥ ត្រូវនឹងថ្ងៃទី២៣ ខែតុលា ឆ្នាំ២០២១ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញជាអធិបតីក្នុងពិធីបើកយុទ្ធនាការបិទផ្សព្វផ្សាយប័ណ្ណព័ត៌មានពីពេលវេលាបញ្ចេញសំរាម និងប្រមូល ដឹកជញ្ជូនសំរាម នៅតាមដងផ្លូវចំនួន ៤៧ខ្សែ ក្នុងក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកអភិបាលក្រុងពះសីហនុ ប្រធានមន្ទីរពាក់ព័ន្ធ មន្ត្រីរាជការ កងកម្លាំងប្រដាប់អាវុធ និងអ្នកស្ម័គ្រចិត្តនិងក្រុមហ៊ុនសំរាម ( KSWM ) យ៉ាងច្រើនកុះករ។

ពិធីនេះរៀបចំធ្វើឡើងនៅទីលានតេជោស្ថិតនៅបណ្តោយវិថីតេជោ សង្កាត់លេខ៤ ក្រុងព្រះសីហនុ ខេត្តព្រះសីហនុ ។

ជាកិច្ចចាប់ផ្តើម លោក អុី សុខឡេង អភិបាល នៃគណៈអភិបាលក្រុងព្រះសីហនុ បានឡើងធ្វើរបាយការណ៍ស្វាគមន៍ និងរាយការណ៍ស្ដីពីយុទ្ធនាការបិទប័ណ្ណព័ត៌មានផ្សព្វផ្សាយពីពេលវេលាបញ្ចេញ និងប្រមូល ដឹកជញ្ជូនសំរាម(លើកទី១ ចំនួន៤៧ខ្សែផ្លូវ)នៅក្នុងក្រុងព្រះសីហនុ ដោយបានលើកឡើងថានាពេលកន្លងមករដ្ឋបាលក្រុងព្រះសីហនុ និងក្រុមហ៊ុនប្រមូល និងដឹកជញ្ជូនសំរាម(KSWM) ដោយមានការអញ្ជើញចូលរួមពីមន្ទីរបរិស្ថាន មន្ទីរសេដ្ឋកិច្ច និងហិរញ្ញវត្ថុ ព្រមទាំងអង្គភាពពាក់ព័ន្ធ បានប្រជុំពិភាក្សាជាច្រើនលើក ដើម្បីឱ្យក្រុមហ៊ុនរៀបចំបង្កើតប័ណ្ណព័ត៌មានផ្សព្វផ្សាយពីពេលវេលាបញ្ចេញ ប្រមូល និងដឹកជញ្ជូនសំរាមនៅក្នុងក្រុងព្រះសីហនុ ដើម្បីឱ្យប្រជាពលរដ្ឋត្រូវបញ្ចេញសំរាម និងពេលវេលាដែលក្រុមហ៊ុន ត្រូវទៅប្រមូល និងដឹកជញ្ជូនសំរាមនៅក្នុងក្រុងព្រះសីហនុ (សម្រាប់លើកទី១ ចំនួន៤៧ខ្សែផ្លូវ) ដែលជាខ្សែផ្លូវអាទិភាព ក្នុងនោះផ្លូវចំនួន ២៧ខ្សែ(មានប័ណ្ណសម្គាល់ពណ៌ក្រហម) ប្រជាពលរដ្ឋត្រូវបញ្ចេញសំរាមចាប់ពីម៉ោង ៧យប់ ដល់ម៉ោង៣ភ្លឺ ហើយក្រុមហ៊ុនត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង ៨ព្រឹក រីឯផ្លូវចំនួន២០ខ្សែទៀត (មានប័ណ្ណសម្គាល់ពណ៌ខៀវ) គឺប្រជាពលរដ្ឋត្រូវបញ្ចេញសំរាមចាប់ពីម៉ោង ៧យប់ ដល់ម៉ោង៣ភ្លឺ ហើយក្រុមហ៊ុនត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង១០ព្រឹក។

ក្នុងករណីដែលប្រជាពលរដ្ឋបញ្ចេញសំរាមខុសពេលវេលា ដែលបានកំណត់នៅក្នុងប័ណ្ណព័ត៌មានទាំង ពីរពណ៌នេះ នឹងត្រូវផាកពិន័យជាប្រាក់ចាប់ពី ២ម៉ឺនរៀលដល់៤០ម៉ឺនរៀល (យោងតាមអនុក្រឹត្យលេខ១១៣) ដោយឡែកក្នុងករណីដែលក្រុមហ៊ុន មិនបានទៅប្រមូល និងដឹកជញ្ជូនសំរាមតាមពេលវេលា ដែលបានកំណត់ក្នុងប័ណ្ណព័ត៌មានទាំង ពីរពណ៌នេះ ក្រុមហ៊ុននឹងត្រូវទទួលការពិន័យដូចមានចែងក្នុងកិច្ចសន្យារបស់រដ្ឋបាលក្រុងព្រះសីហនុ។

ក្នុងឱកាសនោះ ឯកឧត្តម គួច ចំរើន អភិបាលខេត្តព្រះសីហនុ បានមានប្រសាសន៍បើកយុទ្ធនាការបិទផ្សព្វផ្សាយប័ណ្ណព័ត៌មានបញ្ចេញសំរាម និងប្រមូល ដឹកជញ្ជូនសំរាម នៅតាមខ្សែផ្លូវ ៤៧ខ្សែ ក្នុងក្រុងព្រះសីហនុ ដើម្បីបញ្ចប់សំរាមនៅក្នុងក្រុងព្រះសីហនុ ដោយសារកន្លងមកសំរាមមានការកកស្ទះនៅក្រុងព្រះសីហនុ អ្នកបញ្ចេញសំរាមមានចំនួនច្រើន និងការប្រមូលមិនទាន់ទាន់ឆ្លើយតប។

បច្ចុប្បន្នការកកស្ទះសំរាមនៅសល់តែតំបន់ទំនប់រលកប៉ុណ្ណោះ ដោយសារការបញ្ចេញសំរាមមានទាំងនៅលើគោក និងសំរាមមកពីតំបន់កោះ។

ឯកឧត្តម អភិបាលខេត្ត បានបន្តថារដ្ឋបាលក្រុងព្រះសីហនុ បានទទួលសិទ្ធិពីរាជរដ្ឋាភិបាល និងក្រសួងស្ថាប័នពាក់ព័ន្ធតាមខ្លឹមសារអនុក្រឹត្យលេខ១១៣ ដោយរៀបចំកម្មវិធីប្រមូលសំរាម និងសកម្មភាពដឹកជញ្ជូនសំរាមចេញពីក្រុងព្រះសីហនុ។ ជាមួយគ្នានេះ រដ្ឋបាលក្រុងព្រះសីហនុ បានធ្វើការអប់រំ ផ្សព្វផ្សាយដល់ប្រជាពលរដ្ឋជាបន្តបន្ទាប់ និងបានជម្រុញឱ្យក្រុមហ៊ុនប្រមូលសំរាម និងដឹកជញ្ជូនសំរាម ត្រូវជ្រើសរើសបុគ្គលិក រថយន្តដឹកជញ្ជូនសំរាម និងឧបករណ៍បំពាក់បន្ថែមទៅតាមតម្រូវការជាក់ស្តែង។

ឯកឧត្តម អភិបាលខេត្ត បានបញ្ជាក់ថាថ្មីៗនេះ ក្រុងព្រះសីហនុ ទើបបានទទួលពានរង្វាន់ទីក្រុងនិរន្តរភាពបរិស្ថានអាស៊ាន លើកទី៥ ពីប្រទេសឥណ្ឌូនេសុី សម្រាប់ឆ្នាំ២០២១។ ពានរង្វាន់នេះ មិនអាចកាត់ផ្ដាច់ពីការចូលរួមពីលោក-លោកស្រី និងបងប្អូនប្រជាពលរដ្ឋនោះទេ ហើយនេះក៏ជាមោទនភាពដែលយើងបានខិតខំប្រឹងប្រែងទាំងអស់គ្នា។

ថ្ងៃនេះយើងធ្វើសកម្មភាពចុះបិទផ្សព្វផ្សាយប័ណ្ណព័ត៌មាននៅតាមខ្នងផ្ទះប្រជាពលរដ្ឋ និងទីតាំងអាជីវកម្ម-សេវាកម្ម ដែលស្ថិតនៅលើដងផ្លូវទាំង ៤៧ខ្សែ ក្នុងក្រុងព្រះសីហនុ ដើម្បីឱ្យអ្នកបង្កើតសំរាម បញ្ចេញសំរាមតាមពេលវេលាកំណត់ ចាប់ពីម៉ោង ៧:០០យប់ ដល់ម៉ោង ៣ភ្លឺ ហើយក្រុមហ៊ុនធ្វើការប្រមូលសំរាម និងដឹកជញ្ជូនសំរាម ចាប់ពីម៉ោង ៣ភ្លឺ នឹងបញ្ចប់នៅម៉ោង ១០:០០ ព្រឹក។

យើងនឹងបន្តពិនិត្យ និងកែប្រែប័ណ្ណព័ត៌មានបញ្ចេញសំរាម និងប្រមូល ដឹកជញ្ជូនសំរាមជំហានទី២ សម្រាប់ប្រជាពលរដ្ឋ ក្នុងក្រុងព្រះសីហនុបន្តទៀត ដោយតម្រូវឱ្យបញ្ចេញសំរាមពីម៉ោង៧យប់ ដល់ម៉ោង ១២យប់ ហើយក្រុមហ៊ុនចាប់ផ្ដើមប្រមូលពីម៉ោង ១២យប់ ដល់ម៉ោង ៦:០០ព្រឹក។

ឯកឧត្តមអភិបាលខេត្ត បានបន្តថា យុទ្ធនាការថ្ងៃនេះ និងឈានទៅធ្វើការផាកពិន័យ ប្រសិនបើបងប្អូនប្រជាពលរដ្ឋ អ្នកបង្កើតសំរាមមិនបានចូលរួមសហការជាមួយរដ្ឋបាលក្រុងព្រះសីហនុ និងក្រុមហ៊ុនប្រមូល និងដឹកជញ្ជូនសំរាម។ ទន្ទឹមនោះយើងក៏ត្រូវធ្វើការអប់រំផ្សព្វផ្សាយដល់អ្នកបង្កើតសំរាមឱ្យបានទូលំទូលាយ នូវព័ត៌មាន និង ខ្លឹមសារនៃការផាកពិន័យដើម្បីទីក្រុងរបស់យើងស្អាត មានបរិស្ថានល្អ ប្រកបដោយផាសុខភាព និងសុខុមាលភាព។ ខេត្តព្រះសីហនុ ត្រូវបានរាជរដ្ឋាភិបាលកំណត់ជា "តំបន់សេដ្ឋកិច្ចពិសេសគំរូពហុបំណង" ដែលមានសក្តានុពលឆ្នេរខ្សាច់សស្អាត ជាតារារះនាទិស "នារតី" ហើយភាពស្អាតនេះ គឺជាការទាក់ទាញអ្នកទេសចរ និងអ្នកវិនិយោគមកកាន់ខេត្តរបស់យើង និងផ្តល់ការងារជូនប្រជាពលរដ្ឋ បង្កើនជីវភាពកាន់តែល្អប្រសើរ ដូច្នេះយើងត្រូវតែធានាភាពស្អាតសម្រាប់ក្រុង ខេត្តរបស់យើងទាំងអស់គ្នា ។

ជាមួយគ្នានេះ ឯកឧត្តមអភិបាលខេត្ត ក៏បានបញ្ជាក់ថាថ្ងៃនេះជាខួបលើកទី៣០ឆ្នាំ នៃថ្ងៃចុះកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ និងជាខួបលើកទី២៣ឆ្នាំ នៃការបញ្ចប់សង្គ្រាមទាំងស្រុងនៅកម្ពុជារបស់យើង ដោយមានការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឈានទៅដល់ការសម្រេចបានជោគជ័យក្នុងដំណើរស្វែងរកសុខសន្តិភាពពេញបរិបូរណ៍សម្រាប់កម្ពុជា នាឆ្នាំ១៩៩៨ ក្រោមការអនុវត្ត «នយោបាយឈ្នះ ឈ្នះ» និងជាក់ស្តែងរាជរដ្ឋាភិបាលរបស់យើង បានចេញសេចក្តីប្រកាសឱ្យចរាចរ និងប្រើប្រាស់ជាផ្លូវការនូវក្រដាសប្រាក់ ៣០.០០០រៀល សម្រាប់ជាការអបអរសាទរថ្ងៃចុះកិច្ចព្រមព្រៀងសន្តិភាពទីក្រុងប៉ារីស និងជាថ្ងៃមហាសិរីមង្គលរបស់កម្ពុជាយើង ដែលទទួលបានសុខសន្តិភាព ជាបន្តបន្ទាប់។

ក្នុងឱកាសនោះ ឯកឧត្តមអភិបាលខេត្ត ក៏បានឧបត្ថម្ភ ក្រដាសប្រាក់ ៣០.០០០រៀល ជូនអ្នកចូលរួមសរុបចំនួនប្រមាណ៣០០នាក់ ដោយក្នុងម្នាក់មួយសន្លឹកទុកជាអនុស្សាវរីយ៍ផងដែរ៕