ខេត្តបាត់ដំបង ៖ នៅថ្ងៃទី២៩ ខែមិថុនា ឆ្នាំ២០២១នេះបន្ទាប់ពីទទួលបានព័ត៌មានពីអនុសាខាស្រុកឯកភ្នំភ្លាមឯកឧត្តមបណ្ឌិត ប៊ុត គឹមសាន ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង បានចាត់ក្រុមការងារសាខាដែលដឹកនាំដោយឯកឧត្តម សួស សុភ័ក្ភ្រ ហេរញ្ញឹកគណៈកម្មាធិការសាខា និងសហការី នាំយកអំណោយជាសម្ភារគ្រឿងឧបភោគបរិភោគ និងថវិកាមួយចំនួនទៅចូលរួមរំលែកទុក្ខក្នុងពិធីបុណ្យសពលោកស្រីពិន ឈួក អាយុ ៦៧ឆ្នាំដែលរងគ្រោះខ្យល់កន្ត្រាក់រលំផ្ទះសង្កត់លើ(ស្លាប់)និងប្តីរបួស រស់នៅភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង។
ឯកឧត្តម សួស សុភ័ក្ភ្រ ក្នុងនាមឯកឧត្តម បណ្ឌិត ប៊ុត គឹមស៊ាន ប្រធានគណៈកម្មាធិការសាខា បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះគ្រួសាររងគ្រោះដោយក្តីក្រៀមក្រំជាទីបំផុត ។
ជាមួយគ្នានេះ ក្នុងនាមឯកឧត្តមបណ្ឌិតប្រធាន ឯកឧត្តមក៏បានសម្តែងការចូលរួមរំលែកនូវការសោកស្តាយជាមួយនឹងក្រុមគ្រួសាររងគ្រោះ ដែលបានបាត់បង់ភរិយា ម្តាយ ជីដូនជាទីស្រឡាញ់ស្មើនឹងជីវិត ដោយសារឧបទ្ទវហេតុខាងលើ និងសូមកាត់ចិត្តទប់អារម្មណ៍ ព្រោះឧបទ្ទវហេតុដ៏អាក្រក់នេះ វាក៏បានកន្លងហួសផុតទៅហើយដែរ ។
ឯកឧត្តមបានបញ្ជាក់ថា កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន សម្តេចតែងមានការគិតគូរជានិច្ចអំពីសុខទុក្ខចំពោះប្រជាពលរដ្ឋទូទៅដោយគ្មានការរើសអើង ពូជសាសន៍ ប្រពៃណី សាសនា ពណ៌សម្បុរ ឬនិន្នាការនយោបាយឡើយ ។
ក្នុងនោះដែរឯកឧត្តម សួស សុភ័ក្ភ្រ ហេរញ្ញឹកគណៈកម្មាធិការសាខា បានសំណូមពរដល់ប្រជាពលរដ្ឋទាំងអស់ សូមចូលរួមថែរក្សាសុខភាពឲ្យបានល្អ និងអនុវត្តទាំងអស់គ្នាឲ្យបានខ្ជាប់ខ្ជួនតាមសាររបស់ក្រសួងសុខាភិបាលគឺ៖ ៣កុំ និង៣ការពារ ក្នុងគោលបំណងប្រយុទ្ធប្រឆាំងទប់ស្កាត់ការឆ្លងរីករាលដាលជាសកលដោយសារជំងឺកូវីដ-១៩ នៅក្នុងសហគមន៍ផងដែរ ។
សម្ភារនិងថវិកាដែលបានចូលរួមរំលែកទុក្ខក្នុងពិធីបុណ្យសពរួមមាន៖ អង្ករ ៥០គីឡូក្រាម ,មីខ្លាឃ្មុំ ១កេស ,ទឹកសុទ្ធ ១០កេស ,ត្រីខកំប៉ុង ១យួរ , និងថវិកាមួយចំនួនផងដេរ ។
សូមបញ្ជាក់ជូនថា កាលពីរសៀលថ្ងៃទី២៨ ខែមិថុនា ឆ្នាំ២០២១វេលាម៉ោងប្រមាណ ៣និង០០នាទីរសៀល ខេត្តបាត់ដំបង មានភ្លៀងធ្លាក់លាយឡំដោយខ្យល់កន្ត្រាក់ប៉ះពាល់លើផ្ទះប្រជាពលរដ្ឋបឋមចំនួន១៨៩ខ្នងផ្ទះក្នុងស្រុកចំនួន៤ រួមាន!ស្រុកមោងឬស្សីចំនួន១៣៣ខ្នងផ្ទះ ,ស្រុកសង្កែ ១៦ខ្នងផ្ទះ ,ស្រុករុក្ខគីរី ចំនួន៨ខ្នង និងស្រុកឯកភ្នំចំនួន៣២ខ្នងផ្ទះ។
