ខេត្តបាត់ដំបង៖ ដោយមានការព្រួយបារម្ភពីការឆ្លងរាលដាលកាន់តែខ្លាំងនៃជំងឺកូវីដ ១៩ក្នុងសហគមន៍ ឯកឧត្តម ងួន រតនៈ អភិបាលខេត្តបាត់ដំបង បានជំរុញដល់អាជ្ញាធរខេត្តគ្រប់លំដាប់ថ្នាក់ និងប្រជាពលរដ្ឋទាំងអស់ ត្រូវបង្កើនការទប់ស្កាត់ កុំឲ្យជំងឺនេះឆ្លងកាន់តែខ្លាំងបន្ថែមទៀត ខណៈការរកឃើញអ្នកវិជ្ជមានកូវីដ១៩ នៅខែមិថុនា ឆ្នាំ២០២១នេះ មានជារៀងរាល់ថ្ងៃ ។
ឯកឧត្តម អភិបាលខេត្តថ្លែងបែបនេះក្នុងឱកាសដែលឯកឧត្តមនាំយកអំណោយសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទៅចែកជូនដល់ពលរដ្ឋ រងការប៉ះពាល់ជីវភាពដោយសារវិបត្តិជំងឺកូវីដ១៩ ១០០គ្រួសារ នៅក្នុងភូមិបល្ល័ង្គ សង្កាត់វត្តគរ ក្រុងបាត់ដំបង នាព្រឹកថ្ងៃទី២៥ ខែមិថុនា ឆ្នាំ២០២១នេះ។
បន្ថែមពីនេះឯកឧត្តមមានប្រសាសន៍ថា ជំងឺកូវីដ-១៩ កំពុងឆ្លងច្រើននៅក្នុងខេត្តបាត់ដំបង រហូតមានអ្នកស្លាប់បាត់បង់ជីវិតដោយសារជំងឺនេះ ដែលបញ្ហានេះ ត្រូវតែចូលរួមទាំងអស់គ្នាក្នុងការទប់ស្កាត់ ដោយមិនត្រូវមានការព្រងើយកន្ដើយ និងមានការធ្វេសប្រហែសឡើយ ហើយយើងក៏មិនត្រូវទុកចិត្តអ្នកណាម្នាក់នោះទេ ក្រៅពីសមាជិកក្រុមគ្រួសាររបស់ខ្លួន ដូច្នេះគ្រប់គ្នា ត្រូវតែអនុវត្តឲ្យបានខ្ជាប់ខ្ជួនតាមវិធានការ មាន៣កុំ ៣ការពារ តាមការណែនាំរបស់រាជរដ្ឋាភិបាល និងក្រសួងសុខាភិបាល រួមទាំងបង្កើននូវការផ្សព្វផ្សាយ ពីការទប់ស្កាត់នៃការឆ្លងរាលដាលនៃជំងឺកូវីដ-១៩។
ទន្ទឹមនឹងការព្រួយបារម្ភពីការឆ្លងរាតត្បាតនៃជំងឺកូវីដ១៩នេះ អភិបាលខេត្តបាត់ដំបង ក៏បានជំរុញទៅអាជ្ញាធរមូលដ្ឋាន ត្រូវស្វែងរកប្រជាពលរដ្ឋ ដែលបានរងការប៉ះពាល់ផ្នែកសេដ្ឋកិច្ច និងមានជីវភាពខ្វះខាត ដើម្បីផ្ដល់នូវស្បៀងអាហារជូនពលរដ្ឋនៅតាមខ្នងផ្ទះ ដោយធ្វើឲ្យបានច្បាស់លាស់ និងមានតម្លាភាពផងដែរ ។
គួរបញ្ជាក់ថា ចាប់ពីមានការផ្ទុះឆ្លងជំងឺកូវីដ១៩នៅកម្ពុជា សម្រាប់ខេត្តបាត់ដំបង រហូតគិតមកដល់ត្រឹមថ្ងៃទី២៤ ខែមិថុនានេះមានអ្នកឆ្លងជំងឺកូវីដ១៩ ចំនួន៧៣៣នាក់ ត្រូវបានព្យាបាលជាសះស្បើយចំនួន ៤២៦នាក់ ស្លាប់ចំនួន៦នាក់ និងកំពុងសម្រាក់ព្យាបាលចំនួន ៣០១នាក់ ៕
