ខេត្តបាត់ដំបង! ប្រជាពលរដ្ឋបានរិះគន់ខ្លាំងៗទៅលើម្ចាស់គ្រប់គ្រង( ផ្សារខ្វែង )ថាបានយកផ្លូវសាធារណ:ដើម្បីយកកន្លែងលក់ដូរធ្វើអោយប៉ះពាល់យ៉ាងធ្ងន់ធ្ងរទៅដល់សណ្តាប់ធ្នាប់និងកកស្ទះចរាចរណ៍ផងដែរ។
បើយោងតាមការរិះគន់ពីប្រជាពលរដ្ឋជាអ្នកធ្វើដំណើរបានអោយដឹងថា ទាក់ទងនឹងផលប្រយោជន៍បុគ្គលដែលជាម្ចាស់ផ្សារ ផ្លូវអោយតែនៅជាប់ផ្សារតែងតែមានការរំលោភបំពានដោយម្ចាស់ផ្សារនិងអាជីវករលក់ដូរ កញ្ជើ ល្អី តែម្តងដែលបង្កអោយមានការកកស្ទះក្នុងការធ្វើដំណើរសឹងរាល់ថ្ងៃ រាល់ខែ ដោយគ្មានអាជ្ញាធរមូលដ្ឋាន ឬមន្ត្រីជំនាញពាក់ព័ន្ធណាមួយចាប់់អារម្មណ៍ក្នុងការចុះមករៀបចំឡើយ បណ្តែតបណ្តោយអោយម្ចាស់ផ្សារធ្វើអ្វីតាមតែអំពើចិត្ត ដោយមិនខ្វល់ពីផលប៉ះពាល់ដល់ការធ្វើដំណើរឆ្លងកាត់របស់បងប្អូននោះទេ ធ្វើយ៉ាងម៉េចអោយតែបានប្រយោជន៍ចូលក្នុងហោប៉ៅតែប៉ុណ្ណោះ។
ទីតាំងយកផ្លូវទីសាធារណៈដើម្បីយកធ្វើកន្លែងលក់ដូរខាងលើនេះ មានទីតាំងស្ថិតក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ដែលទីតាំងខាងលើនេះតែងតែអោយប្រជាពលរដ្ឋ និងអាជីវករលក់ដូរលើចិញ្ចើមផ្លូវជារៀងរាល់ថ្ងៃធ្វើអោយប៉ះពាល់យ៉ាងធ្ងន់ធ្ងរទៅដល់សណ្តាប់ធ្នាប់បង្ករអោយមានការកកស្ទះពិបាកដល់ការធ្វើដំណើររបស់បងប្អូនប្រជាពលរដ្ឋក៏ដូចជាភ្ញៀវទេសចរណ៍ផងដែរ ។
ពាក់ព័ន្ធទៅនឹងការលើកឡើងខាងលើលោក ឡុច ឆុន មេឃុំអូរដំបង១ លោកបានអោយអ្នកយកព័ត៌មានយើងដឹងនៅថ្ងៃទី០៤ ខែឧសភា ឆ្នាំ២០២១នេះថា រឿងហ្នឹងលោកធ្លាប់បានចុះណែនាំរួចហើយ ហើយពេលនេះដែរឯកឧត្តមអភិបាលខេត្តក៏មានគម្រោង ពង្រីកផ្លូវនិងធ្វើស្ពាន ហើយក្រុមការងារបានចុះរៀបចំបាញ់គំនូសរួចហើយដែរ តែពេលនេះសូមទ្រាំបន្តិចទៅ នៅពេលដែលស្ពានធ្វើរួចរាល់និងទូរលាយវិញហើយ។