(ប៉ៃលិន) ៖ មានប្រជាពលរដ្ឋមួយចំនួន បាននាំគ្នានិយាយត្អូញត្អែរ និង ព្រួយបារម្ភយ៉ាង ខ្លាំង ចំពោះសុវត្ថិភាពផ្លូវដង្ហើម ខណ:ពួកគាត់អះអាងថា មានប្រជាពលរដ្ឋ រស់នៅក្បែរផ្សារប៉ាង រលឹម និង អាជីវករមួយចំនួន ដែលលក់ដូរនៅក្នុងផ្សារមួយនេះ តែងតែដឹកសំរាមយកសំរាមទៅបោះចោលទាំងយប់ទាំងថ្ងៃ យ៉ាងអនាធិបតេយ្យនៅលើចិញ្ចើមផ្លូវក្បែរភូមិ ដែលរលួយបង្កទៅជាក្លិនស្អុយអាសោច លុះពេលខ្យល់បក់បោកចូលក្នុងផ្ទះខ្លួនម្តងៗ ស្ទើរទ្រាំលែងកើត ហើយក៏បង្កទៅជាជំងឺរលាកផ្លូវដង្ហើម និងកើតជាជំងឺផ្តាសាយញឹកញាប់ផងដែរ ។
ហេតុការណ៍ប្រជាពលរដ្ឋនាំគ្នាត្អូញត្អែរពីបញ្ហាសុខភាពផ្លូវដង្ហើម បន្ទាប់ពីគេយកសំរាមទៅបោះចោលយ៉ាងអនាធិបតេយ្យនៅលើចិញ្ចើមផ្លូវនេះ បានកើតឡើងកាលពីវេលាម៉ោង៤ និង៣០នាទីរសៀលថ្ងៃទី០៦ ខែមេសា ឆ្នាំ២០២១ ស្ថិតនៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីបុរស ឈ្មោះ ម៉ៅ ពន្លក អាយុ៤៥ឆ្នាំ និង ឈ្មោះ អ៊ូច សារ៉ាវុធ ភេទប្រុស អាយុ៣៦ឆ្នាំ ព្រមទាំងប្រជាពលរដ្ឋរស់នៅក្បែរៗ កន្លែងគេយកសម្រាមទៅបោះចោលនេះ បានរៀបរាប់ឱ្យដឹងទាំងក្តីព្រួយបារម្ភចំពោះសុវត្ថិភាពផ្លូវដង្ហើមខ្លួនដូចៗគ្នាថា ៖ មានប្រជាពលរដ្ឋមួយចំនួនរស់នៅក្នុងភូមិប៉ាងរលឹម និងអាជីវករក្នុងផ្សារប៉ាងរលឹមមួយចំនួន បាននាំគ្នាដឹកយកសម្រាម និងកំទេចកាកសំណល់ផ្ទះបាយ ដូចជា សំបកបន្លែផ្លែឈើ សំបកពងមាន់ ពងទា ស្រកាត្រី និងក្បាលត្រី ទៅចាក់ចោលអនាធិបតេយ្យនៅលើចិញ្ចើមផ្លូវក្បែរផ្ទះពួកគាត់ អស់រយ:ពេលជាយូរមកហើយ លុះក្រោយពេលសំរាមស្អុយរលួយ គាប់ជួននឹងខ្យល់បក់មកពីទិសខាងកើតម្តងៗ បណ្តាលឱ្យជះក្លិនស្អុយអាសោចស្ទើរតែទ្រាំមិនបាន ហើយចង់លក់ដីទៅរស់នៅកន្លែងផ្សេង ជាពិសេសពេលដែលគេដុតសម្រាមនេះម្តងៗ ធ្វើឱ្យផ្សែងហុយឆួលឈ្លក់ ចូលទៅក្នុងផ្ទះ ធុំក្លិនឆ្ងៀមទ្រុប លំបាកក្នុងការដកដង្ហើមយ៉ាងខ្លាំង ជាពិសេសជាញឹកញាប់ តែងធ្វើឱ្យក្មេងតូចៗ និងមនុស្សចាស់ កើតជំងឺផ្តាសាយ រលាកច្រមុះ រលាកផ្លូវដង្ហើម ក៏សំបូរទៅដោយសត្វរុយក្បាលខៀវ ហើរចូលទៅក្នុងផ្ទះ លំបាកក្នុងការហូបអាហារផងដែរ ។
ប្រភពដដែលបានបន្តទៀតថា ការចាក់សំរាមនៅលើចិញ្ចើមផ្លូវនេះ គឺមានរយ:ពេលជាង១ឆ្នាំមកហើយ ដោយយូរៗម្តង ទើបឃើញអាជ្ញាធរចុះទៅពិនិត្យ ក៏ធ្លាប់មានខាងមន្ត្រីបរិស្ថានយកគ្រឿងចក្រទៅរុញទំលាក់ក្នុងជង្ហុកផងដែរ តែក្លិននៅស្អុយមិនបាត់នោះឡើយ ទាល់តែដឹកយកទៅបោះចោលនៅកន្លែងផ្សេងទើបអាចឈប់មានក្លិនបែបនេះ ។
ពួកគាត់ក៏បានសំណូមពរឱ្យប្រជាពលរដ្ឋរស់នៅក្នុងភូមិក្បែរៗ ផ្សារ និងអាជីវករក្នុងផ្សារប៉ាងរលឹមមួយចំនួន ឈប់ដឹកយកសំរាមទាំងនេះទៅបោះចោលនៅលើចិញ្ចើមផ្លូវទៀត ដោយខាងផ្សារ ត្រូវរករថយន្តដឹកសំរាមយកទៅចាក់នៅទីលានចាក់សំរាមណាមួយ ដែលស្ថិតនៅឆ្ងាយពីលំនៅឋានប្រជាពលរដ្ឋ ព្រោះជាតិស្អុយ និងផ្សែងពុល ពិតជាប៉ះពាល់ដល់សុខភាពពួកគាត់ខ្លាំងណាស់ ។
ពាក់ព័ន្ធនឹងបញ្ហាខាងលើនេះ លោក ស៊ុន យី អភិបាលក្រុងប៉ៃលិន បានឱ្យដឹងថា ៖ ខាងលោកអត់ទាន់ដឹងរឿងនេះទេ ក្រោយពីទទួលបានដំណឹងហើយ នឹងឱ្យមន្ត្រីក្រោមឱវាទចុះទៅរៀបចំសម្អាត ។
រីឯលោក គឹម សុខា ប្រធានមន្ទីរបរិស្ថានខេត្តប៉ៃលិន ក៏បានឱ្យដឹងដែរថា ៖ ខាងលោកនឹងចាត់ឱ្យមន្ត្រីចុះទៅរៀបចំដុតកំទេចចោល ហើយក៏ឱ្យប្រជាពលរដ្ឋរស់នៅក្បែរកន្លែងចាក់សំរាមនោះ ស៊ើបអង្កេតមើល បើសិនជាឃើញហើយថតរូបឱ្យបានច្បាស់ ខាងលោកនឹងហៅអ្នកប្រព្រឹត្តបទល្មើសនេះ ទៅធ្វើកិច្ចសន្យាអប់រំ បើសិនជានៅមិនរាងចាល ខាងលោកនឹងចាត់ការតាមផ្លូវច្បាប់ ៕
