ខេត្តបាត់ដំបង! ក្រុមចោរ០២នាក់បាន សណ្តោងរទេះម៉ូតូចេញលួចខណ:ផ្លោះរបងចូលផ្ទះអ្នកស្រុកត្រូវម្ចាស់ដឹងទាន់ដេញស្រែកឆោឡោផ្អើលរត់យករួចខ្លួនសន្សល់ទុកនូវវត្ថុតាងម៉ូតូ០១គ្រឿងនិងរទេះអូសមួយផងដែរ។
ប្រភពចេញពីកន្លែងកើតហេតុបានប្រាប់ថា ហេតុការណ៍ប៉ុនប៉នលួចយកទ្រព្យសម្បត្តិខាងលើនេះបានកើតឡើងនៅវេលាម៉ោងជាង០២រំលងអាធ្រាត ឈានចូលថ្ងៃទី០២ ខែមេសា ឆ្នាំ២០២១ នៅត្រង់ចំណុចភូមិសូភី២ សង្កាត់រតន: ក្រុងបាត់ដំបង ។
តាមការបញ្ជាក់ពីម្ចាស់ផ្ទះជនរងគ្រោះមានឈ្មោះ ភារម្យ អាយុជាង ៣០ ឆ្នាំ រស់នៅភូមិសង្កាត់កន្លែងកើតហេតុខាងលើបានអោយដឹងថា ជនសង្ស័យកាលថ្មីៗកន្លងទៅនេះបានធ្វើសកម្មភាពចូលលួចផាលត្រាក់ទ័របានម្តងរួចហើយ រហូតដល់យប់កើតហេតុនេះជនសង្ស័យដែលមានបក្សពួកចំនួន ២នាក់បានផ្លោះរបងចូលផ្ទះរបស់ខ្លួនម្តងទៀតហើយបានប្រមូលយកគ្រឿងត្រាក់ដាក់ក្នុងការ៉ុង ប្រុងជញ្ជូនយកចេញដើម្បីដាក់លើរទេះអូស ប៉ុន្តែត្រូវលោកបានដឹងខ្លួនទាន់ក៏ស្រែកឆោឡោឡើងបណ្តាលឲ្យជនសង្ស័យផ្អើលរត់ចោលម៉ូតូ និងរទេះអូសនៅកន្លែងកើតហេតុតែម្តង។
បច្ចុប្បន្នវត្ថុតាងខាងលើត្រូវបានសមត្ថកិច្ចទទួលយកនិងបញ្ជូនទៅរក្សាទុកនៅអធិការដ្ឋាននគរបាលក្រុងបាត់ដំបងដើម្បីរៀបចំចាត់ការតាមនីតិវិធី៕
