ក្នុងសារពិសេស នៅយប់ថ្ងៃទី៣ ខែមីនា ម្សិលមិញ សម្តេចតេជោ នាយករដ្ឋមន្ត្រី ហ៊ុន សែន បានប្រកាសចេញនូវបទបញ្ជាផ្ទាល់មាត់បន្ទាន់មួយ ទៅកាន់អាជ្ញាធរសមត្ថកិច្ច ឲ្យចាត់វិធានការរាំងខ្ទប់ មិនឲ្យមានអ្នកចេញពីខេត្តព្រះសីហនុឡើយ។ វិធានការនេះ ដើម្បីទប់ស្កាត់កុំឲ្យរីករាលដាលជំងឺកូវីដ១៩ ចេញពីខេត្តព្រះសីហនុ ទៅកាន់តំបន់ផ្សេង។
ទន្ទឹមនឹងនេះ សម្តេចតេជោ ក៏បានជំរុញឲ្យមានការចាក់វ៉ាក់សាំងឲ្យបានច្រើន ទាំងមន្ត្រីរាជការ និងទាំងប្រជាពលរដ្ឋ ដោយរាជរដ្ឋាភិបាល នឹងបញ្ជូនវ៉ាក់សាំងបន្ថែម ទៅខេត្តព្រះសីហនុ នៅថ្ងៃទី៤មីនាស្អែកនេះ ទាំងវ៉ាក់សាំងស៊ីណូហ្វាម និងទាំងវ៉ាក់សាំង អាស្ត្រាហ្សេនីកា។ វ៉ាក់សាំងស៊ីណូហ្វាម សម្រាប់មនុស្ស អាយុចន្លោះពី ១៨ឆ្នាំ ដល់ ៥៩ឆ្នាំ និងវ៉ាក់សាំង អាស្ត្រាហ្សេនីកា សម្រាប់ ៦០ឆ្នាំឡើង។
ក្នុងបញ្ជាផ្ទាល់មាត់នេះ សម្តេចតេជោ ហ៊ុន សែន បានបញ្ជាក់ហើយបញ្ជាក់ទៀតថា បិទចរាចរណ៍តែមនុស្ស មិនឲ្យចេញពីខេត្តព្រះសីហនុប៉ុណ្ណោះ តែការដឹកជញ្ជូនទំនិញចេញចូលខេត្តព្រះសីហនុ នៅធ្វើដដែល។
សូមរម្លឹកថា នៅខេត្តព្រះសីហនុ ចំនួនអ្នកឆ្លងកូវីដ១៩ បានកើនឡើងខ្លាំង ដោយគិតមកដល់ព្រឹកថ្ងៃទី៣ ខែមីនានេះ ឡើងដល់ ៦២នាក់។ ក្នុងនោះ ភាគច្រើនជាជនជាតិចិន៕