ខេត្តបាត់ដំបង! មន្ទីរសុខាភិបាលនៃរដ្ឋបាលខេត្តបាត់ដំបងបានធ្វើតេស្តរកឃើញករណីឆ្លងថ្មី វិជ្ជមានជំងឺកូវីដ-១៩ កើនដល់០៦នាក់បន្ថែមទៀតក្នុងទឹកដីនៃខេត្តបាត់ដំបង។
យោងតាមព័ត៌មានបឋមពីមន្ទីរសុខាភិបាល នៃរដ្ឋបាលខេត្តបាត់ដំបងបានឲ្យដឹងថា នៅថ្ងៃទី០៧ និងថ្ងៃទី០៨ ខែឧសភា ឆ្នាំ២០២១ ក្រុមឆ្លើយតបបន្ទាន់របស់មន្ទីរសុខាភិបាលខេត្តបាត់ដំបងបានរកឃើញករណីវិជ្ជមានជំងឺកូវីដ-១៩ ចំនួន០៦នាក់ជាករណីថ្មីទៀត តាមរយ:ការធ្វើតេស្តដោយឧបករណ៍ GeneXpert ដោយករណីទី ០១រកឃើញលើស្ត្រីម្នាក់ រួមជាមួយកូន និងចៅ ចំនួន០៣នាក់ផ្សេងទៀតដែលទើបត្រឡប់មកពីទីក្រុងភ្នំពេញ រីឯករណីទី០២ រកឃើញលើបុរសចំនួន០២នាក់ទើបវិលត្រឡប់មកពីទីក្រុងថេប ប្រទេសថៃ។
ពលរដ្ឋដែលរកឃើញវិជ្ជមានកូវីដ-១៩ ចំនួន០១គ្រួសារមានគ្នាចំនួន ០៤នាក់ខាងលើមាន!១-ឈ្មោះ ហ៊ុន លី ភេទស្រី អាយុ៤៤ឆ្នាំជាជីដូន ចំណែកកូន និងចៅ ០៣នាក់ទៀត /១-ឈ្មោះ វង្ស ជី ភេទប្រុស អាយុ១០ឆ្នាំ-/២-ឈ្មោះ វង្ស ស្រីនាត ភេទស្រី អាយុ០៧ឆ្នាំ /៣-ឈ្មោះ ឡុក វិទ្ធី ភេទស្រី អាយុ០១ឆ្នាំ ដែលទាំងអស់គ្នាបានធ្វើដំណើរពីទីក្រុងភ្នំពេញ ឆ្ពោះមកកាន់លំនៅស្ថានក្នុងភូមិតាសែន ឃុំត្រាង ស្រុកកំរៀង ខេត្តបាត់ដំបង។
មន្ទីរសុខាភិបាលខេត្តបាត់ដំបងបានបញ្ជាក់ទៀតថា÷ ស្ត្រីព្រមទាំងកូននិងចៅដែលវិជ្ជមានជំងឺកូវីដ-១៩នេះកាលពីព្រឹកថ្ងៃទី០៥ ខែឧសភា ឆ្នាំ២០២១ពួកគេបានធ្វើដំណើរចេញពីភ្នំពេញតាមរយ:មធ្យោបាយរថយន្តសាំយ៉ុង០១គ្រឿងមិនចាំស្លាកលេខ ដោយរួមដំណើរជាមួយមនុស្សចំនួន ១១នាក់ផ្សេងទៀត ធ្វើដំណើរឆ្លងកាត់ក្រុងបាត់ដំបងឆ្ពោះទៅកាន់ព្រំប្រទល់រវាងខេត្តបាត់ដំបង និងខេត្តប៉ៃលិន ហើយបានសុំព្រះសង្ឃគង់នៅក្នុងវត្តសិរីសួស្តី បានសម្រាក ១យប់ លុះព្រឹកឡើងថ្ងៃទី០៦ ខែឧសភា ស្ត្រី ព្រមទាំងកូននិងចៅ បានបន្តដំណើរដោយជិះម៉ូតូឌុបពីវត្តឆ្ពោះទៅកាន់ផ្សារស៊ីន ឃីម ក្នុងស្រុកកំរៀង។
ក្រោយពីពួកគាត់ធ្វើដំណើរមកដល់ស្រុកកំរៀងភ្លាម ប្រជាការពារក្នុងភូមិតាសែនម្នាក់មានការសង្ស័យក៏នាំអ្នកទាំងអស់គ្នាជិះម៉ូតូកង់បីដឹកជញ្ជូនទៅពិនិត្យសុខភាពនៅមណ្ឌលសុខភាពត្រាងតែម្តង ដោយក្រុមគ្រូពេទ្យក្នុងមណ្ឌលសុខភាពបានយកសំណាកអ្នកទាំង០៤នាក់ទៅពិនិត្យរហូតដល់ថ្ងៃទី០៧ ខែឧសភា ទើបមន្ទីរពិសោធន៍នៃមន្ទីរពេទ្យបង្អែកខេត្តបាត់ដំបងបញ្ជក់លទ្ធផលគឺ វិជ្ជមានជំងឺកូវីដ-១៩ទាំង០៤នាក់។
ដោយឡែកលទ្ធផលបឋមឆ្លងតាមការតេស្តលើបុរស០២នាក់ករណីចុងក្រោយជាពលករលក់ផ្កាមកពីទីក្រុងថេប ដែលកំពុងធ្វើចត្តាឡីស័កកម្រិត០១ វិទ្យាល័យ ពេជ្រចិន្តាក្នុងស្រុកភ្នំព្រឹក។
អនុវត្តវិធានការបន្ទាន់ចំពោះមុខមន្ត្រីមន្ទីរសុខាភិបាលខេត្ត ក៏ដូចជាក្រុមគ្រូពេទ្យប្រតិបត្តិស្រុកសំពៅលូនបានចុះស្រាវជ្រាវរកឃើញអ្នកប៉ះពាល់ចំនួន ០៣នាក់ទៀត ហើយបាននាំយកទៅធ្វើតេស្តយកវត្ថុសំណាក និងធ្វើចត្តាឡីស័ក ១៤ថ្ងៃ។
គួរបញ្ជាក់ថា បច្ចុប្បន្នខេត្តបាត់ដំបងមានករណីឆ្លងជំងឺកូវីដ-១៩ ក្នុងព្រឹត្តិការណ៍ ២០ កុម្ភ: មានចំនួន០៦ករណី និងករណីនាំចូលចំនួន០៨នាក់ សរុបទាំងអស់ចំនួន ១៤ករណី៕