ករណីពុលស្រា នៅស្រុកកំពង់ត្រាច ខេត្តកំពត អ្នកស្លាប់ កើនដល់១០នាក់

ថ្ងៃពុធ 26 ឧសភា 2021, 11:21

ក្រសួងសុខាភិបាល នាថ្ងៃទី២៥ ខែឧសភា ឆ្នាំ២០២១ បានចេញសេចក្ដីជូនព័ត៌មានស្ដីពីករណីប្រជាពលរដ្ឋចំនួន ១០នាក់ បានស្លាប់ដោយសារពុលស្រា នៅស្រុកកំពង់ត្រាច ខេត្តកំពត។

សេចក្តីជូនដំណឹងរបស់ក្រសួងសុខាភិបាលបានបញ្ជាក់ថា កាលពីព្រឹកថ្ងៃទី២៤ ខែឧសភា ឆ្នាំ២០២១ ក្រុមឆ្លើយតបបន្ទាន់នៃការិយាល័យស្រុកប្រតិបត្តិកំពង់ត្រាច និងមន្ទីរសុខាភិបាលខេត្តកំពត បានសហការជាមួយអាជ្ញាធរ និងសមត្ថកិច្ច ចុះស្រាវជ្រាវករណីពុលស្រា ក្នុងភូមិធ្នង់ ឃុំឬស្សីស្រុកខាងកើត និងភូមិក្ងាប ឃុំស្វាយទងខាងជើង ស្រុកកំពង់ត្រាច និងនាំយកអ្នកជំងឺបញ្ជូនមកព្យាបាលនៅមន្ទីរពេទ្យបង្អែកស្រុក។

គិតមកដល់ល្ងាចថ្ងៃទី២៥ ឧសភា ២០២១ អ្នកជំងឺដែលចូលសម្រាកព្យាបាលនៅមន្ទីរពេទ្យបង្អែកស្រុកកំពង់ត្រាច បានជាសះស្បើយជាបន្តបន្ទាប់ និងវិលត្រឡប់ទៅលំនៅដ្ឋានវិញ។

តាមរយៈការចុះពិនិត្យ និងស្រាវជ្រាវផ្ទាល់ បានបញ្ជាក់ថា ជនរងគ្រោះទី១ បានស្លាប់កាលពីថ្ងៃទី២១ ឧសភា ឆ្នាំ២០២១ ដោយសង្ស័យពុលស្រាស ព្រោះសពបានពិសារស្រាស និងស្រាថ្នាំ ដែលទិញនៅក្នុងភូមិខាងលើ។ ក្រោយមក ពោលគឺគិតចាប់ពីថ្ងៃទី២១ ដល់ថ្ងៃទី២៤ ឧសភា ឆ្នាំ២០២១ មានអ្នកស្លាប់ជាបន្តបន្ទាប់ចំនួន៩នាក់(២នាក់ស្លាប់នៅមន្ទីរពេទ្យ ៩នាក់ស្លាប់នៅផ្ទះ) និងឈឺចំនួន៥៦នាក់ ក្រោយពិសារស្រាស ស្រាថ្នាំ នៅក្នុងពិធីបុណ្យសពជនរងគ្រោះខាងលើ។

សេចក្តីជូនដំណឹងបន្តថា ក្រោយយកសំណាកស្រាទៅវិភាគ លទ្ឋផលពីមជ្ឍមណ្ឌលជាតិនៃមន្ទីរពិសោធន៍សុខាភិបាល នៅថ្ងៃទី២៥ ខែឧសភា ២០២១ បានបញ្ជាក់ថា នៅក្នុងស្រា មានសារធាតុមេតាណុលលើសកម្រិតធំជាង 0,2ភាគរយ ដល់១១,៩ភាគរយ ដែលធ្វើឱ្យពុល ដែលកម្រិតពុលមិនត្រូវលើសពី០,១ភាគរយ ឡើយ។

ក្រុមការងារឆ្លើយតបបន្ទាន់ រួមទាំងអាជ្ញាធរ សមត្ថកិច្ច បានចុះអប់រំ ឱ្យអ្នកលក់ អ្នកបោះដុំ ផ្អាកអាជីវកម្មស្រាស ដែលមិនមានការត្រួតពិនិត្យត្រឹមត្រូវ និងណែនាំប្រជាពលរដ្ឋតាមភូមិខាងលើ បញ្ឈប់ជាបន្ទាន់ការពិសារស្រា ដែលផលិត ឬស្រាបិត មិនបានត្រឹមត្រូវតាមក្បួនបច្ចេកទេស។

ក្នុងករណីប្រជាពលរដ្ឋមានបញ្ហាសុខភាព ឬមានរោគសញ្ញានៃការពុលស្រា ដូចជាឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម ឬសង្ស័យមានការឆ្លងជំងឺដ៏ទៃទៀត សូមប្រញាប់ទៅស្វែងរកការពិនិត្យនៅមន្ទីរពេទ្យ ជាបន្ទាន់៕