ខេត្តបាត់ដំបង! នៅថ្ងៃទី២០ ខែមករា ឆ្នាំ២០២១នេះ ឯកឧត្តម ឡោក ហ៊ួរ តំណាងរាស្ត្រមណ្ឌលបាត់ដំបងនិងជាប្រធានក្រុមការងារថ្នាក់កណ្ដាលចុះជួយស្រុកសង្កែ រួមជាមួយឯកឧត្តម សែម ស៊ីណង ប្រធានក្រុមការងារគណបក្សប្រជាជនកម្ពុជាចុះជួយឃុំនរា បានអញ្ជើញចុះជួបសំណេះសំណាលនិងចែកអាវយឺតជូនដល់កុមារា កុមារី សរុបចំនួន៨០០នាក់។
ពិធីជួបសំណេះសំណាលនិងចែកអាវយឺតជូនដល់កុមារា កុមារី នាថ្ងៃនេះដែរប្រព្រឹត្តធ្វើឡើង នៅក្នុងបរិវេណវត្តបាឡាត់ ស្ថិតក្នុងឃុំនរា ស្រុកសង្កែ ខេត្តបាត់ដំបង ក្រោមអធិបតីភាពដ៏ខ្ពង់ខ្ពស់របស់ឯកឧត្តម ឡោក ហ៊ួរ អ្នកតំណាងរាស្ត្រមណ្ឌលបាត់ដំបងនិងជាប្រធានក្រុមការងារថ្នាក់កណ្ដាលចុះជួយស្រុកសង្កែ រួមជាមួយឯកឧត្តម សែម ស៊ីណង ប្រធានក្រុមការងារគណបក្សប្រជាជនកម្ពុជាចុះជួយឃុំនរា ដោយមានការចូលរួមពីឯកឧត្តម លោក លោកស្រី ដែលជាក្រុមការងារយុវជនរបស់គណបក្សប្រជាជនជាច្រើននាក់បានចូលរួមផងដែរ។
នាឱកានោះដែរ ឯកឧត្តម ឡោក ហួរ បានមានប្រសាសន៍ថា នេះជាការងារថ្មីមួយដែលក្រុមការងារយើងមិនសូវបានធ្វើទៅលើកូនៗ ដែលរយ:កន្លងមកយើងធ្វើតែទៅលើមនុស្សចាស់ និងមនុស្សពេញវ័យតែប៉ុណ្ណោះ តែមួយរយៈចុងក្រោយនេះ ក្រុមការងារយើងបាននិងកំពុងយកចិត្តទុកដាក់ខ្ពស់ទៅលើកូនតូចៗ ដែលជាកុមារា កុមារីនេះ ព្រោះពួកគាត់ក៏ត្រូវការភាពស្និតស្នាល ភាពកក់ក្តៅ និងក្តីស្រលាញ់ចំពោះពួកគាត់ចេញពីមនុស្សចាស់នេះផងដែរ។
ហើយការចុះចែកអាវដល់កូនៗ កុមារា កុមារី នាពេលនេះដែរ ជាការឆ្លើយតបស្របពេលដែលពិភពលោកកំពុងព្រួយបារម្ភ និងប្រយុទ្ធប្រឆាំងនឹងជម្ងឺកូវីដ-១៩ ដែលសម្ដេចបានយកចិត្តទុក្ខដាក់ខ្ពស់បំផុតចំពោះបងប្អូនប្រជាពលរដ្ឋងាយរងគ្រោះនៅមូលដ្ឋាន ព្រោះឥទ្ធិលជម្ងឺកូវីដ-១៩ បានធ្វើឲ្យប៉ះពាល់ដល់សេដ្ឋកិច្ច និងជីវភាពរបស់បងប្អូនក្នុងការប្រកបរបរទទួលទានប្រចាំថ្ងៃ ។ហើយជាមួយគ្នានេះដែរឯកឧត្តមក៏បានអំពាវនាវដល់បងប្អូន ត្រូវមានការប្រុងប្រយ័ត្ននិងថែទាំសុខភាពឱ្យបានល្អ ជាពិសេសទៅលើកុមារតូចៗ ត្រូវស្លៀកខោអាវវែង និងគេងនៅក្នុងមុងជ្រលក់ថ្នាំដើម្បីការពារជំងឺគ្រុនឈាមដែលកំពុងរីករាលដាល ព្រមទាំងចេះសម្អាតអនាម័យជុំវិញខ្លួន និងចូលរួមគោរពច្បាប់ចរាចរណ៍ទាំងអស់គ្នា ហើយជាពិសេសត្រូវចូលរួមការពារទប់ស្កាត់ ការរីករាលដាលនៃជំងឺកូវីដ-19 ដោយគោរពតាមការណែនាំរបស់ក្រសួងសុខាភិបាល ដោយលាងដៃអោយបានញឹកញាប់ជាមួយសាប៊ូ អាល់កុល ឬជែល នៅមុនពេលឬក្រោយពេលហូបអាហារ ហើយពេលចេញទៅណាមកណាត្រូវពាក់ម៉ាស់ជាប្រចាំ និងហាមជួបជុំមនុស្សច្រើនដែលមិនមានការចាំបាច់។
គួរបញ្ជាក់ថា អំណោយដែលបានផ្ដល់ជូនដល់កូនតូចៗ កុមារា កុមារី ទាំងចំនួន៨០០នាក់នាពេលនេះ ក្នុងម្នាក់ៗទទួលបានអាវយ៉ឺតដ៏ស្រស់ស្អាតមួយដូចៗគ្នា៕
