ខេត្តបាត់ដំបង៖ ក្រោយផ្ទុះឡើងខ្លាំងសារជាថ្មីនូវជំងឺឆ្លងកូវីដ-19 នៅក្នុងខេត្តសាមុទសាខន ប្រទេសថៃ នាយប់ថ្ងៃទី២៩ ខែធ្នូ ឆ្នាំ២០២០នេះ ក្រុមការងារនៃមន្ទីរទេសចរណ៍ខេត្តបាត់ដំបង សហការជាមួយគណ:បញ្ជាការឯកភាពខេត្តនិងក្រុង រួមនិងអាជ្ញាធរពាក់ព័ន្ធ បានចុះឆ្មក់ពិនិត្យទៅលើទីតាំងភោជនីយដ្ឋានបង្កប់ខារ៉ាអូខេ និងក្លឹបកំសាន្តនានាជាច្រើនកន្លែងនៅកណ្តាលក្រុងបាត់ដំបង ដើម្បីរួមចំណែកការពារ ទប់ស្កាត់ការឆ្លងរីករាលដាលនៃជំងឺកូវីដ-19ចូលក្នុងសហគមន៍។
លោក នួន ថា អនុប្រធានមន្ទីរទេសចរណ៍ខេត្តបានបញ្ជាក់ប្រាប់ឲ្យដឹងថា ក្រោយពីចុះឆ្មក់ពិនិត្យយ៉ាងយកចិត្តទុកដាក់ពីក្រុមការងារជំនាញជាលទ្ធផល ទីតាំងអាជីវកម្មមួយចំនួនធំមានសភាពស្ងប់ស្ងាត់ មិនមានការបើកច្រៀង ឬប្រមូលផ្តុំគ្នាផឹកសុីច្រើននោះទេ ដោយសារពួកគាត់មានការយល់ដឹង និងគោរពទៅតាមការណែនាំរបស់មន្ទីរដែលបានចុះធ្វើការណែនាំជាបន្តបន្ទាប់រយះពេលកន្លងមក ប៉ុន្តែក្នុងនោះក្រុមការងារក៏សង្កេតឃើញនៅមានទីតាំងខារ៉ាអូខេ ចំនួន២កន្លែងដែលគ្មានអាជ្ញាប័ណ្ណទេសចរណ៍និងលួចលាក់បើកបន្ទប់ខារ៉ាអូខេច្រៀងបំពាននិងសេចក្តីណែនាំរបស់រាជរដ្ឋាភិបាល ហើយខាងមន្ទីរក៏បានស្នើសុំគោលការណ៍បិទទៅរដ្ឋបាលខេត្តហើយដែរ។
លោកអនុប្រធានមន្ទីរបានបន្តថា ដោយឡែកអាជីវកម្មភោជនីយដ្ឋាន អាហារដ្ឋាន ដែលមានការជួបជុំហូបចុក តាមការត្រួតពិនិត្យជាក់ស្តែង យើងឃើញថា បុគ្គលិកដែលបំរើការនៅតាមភោជនីយដ្ឋាននានាគឺពួកគាត់មានការ ពាក់ម៉ាស់ មានអ្នកចាំបាញ់អាល់កុល វាស់កម្តៅ និងគម្លាតសុវត្ថិភាព ពិសេសបានបិតស្លាកសញ្ញាផ្សព្វផ្សាយពីកូវីដ -១៩ព្រមទាំងបានកត់ត្រាឈ្មោះ និងវាស់កម្តៅ បុគ្គលិករាល់ម៉ោងចេញចូលផងដែរ។
បន្ថែមពីនេះលោកអនុប្រធានមន្ទីរទេសចរណ៍ខេត្តក៏បានអប់រំណែនាំបន្ថែមទៅដល់ម្ចាស់ ទីតាំងខារ៉ាអូខេ ក្លឹបកម្សាន្ត និងភោជនីយដ្ឋានទាំងអស់ត្រូវពង្រឹងបន្ថែមនូវការអនុវត្តគោរពតាមគោលការណ៍ណែនាំរបស់ប្រមុខរាជរដ្ឋាភិបាល ក្រសួងសុខាភិបាល និងមន្ទីរទេសចរណ៍អោយបានខ្ចប់ខ្ចួនដោយមិនអនុញ្ញាតអោយបើកដំណើរការខារ៉ាអូខេ ឬក្លិបកម្សាន្តនោះទេ ហើយក៏មិនត្រូវលួចបើកនៅពេលដែលក្រុមការងារបានចេញផុតនោះដែរ ត្រូវរងចាំរហូតដល់មានការជូនដំណឹងសារជាថ្មី៕