ខេត្តបាត់ដំបង! ដើម្បីរួមចំណែកជាមួយ រាជរដ្ឋាភិបាលក៏ដូចជាក្រសួងសុខាភិបាល ក្នុងការទប់ស្កាត់ការរីករាលដាលនៃជំងឺកូវីដ១៩ឆ្លងចូលសហគមន៍ ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង សម្រេចបិទផ្អាកជាបណ្តោះអាសន្ននូវរម្មណីយដ្ឋានទូទាំងខេត្តបាត់ដំបងមិនអោយពលរដ្ឋទៅកម្សាន្តលេងរយៈពេល១៤ គិតចាប់ពីថ្ងៃទី ០៧ ខែមេសា រហូតដល់ថ្ងៃទី២០ ខែមេសា ឆ្នាំ២០២១នេះ។
ឯកឧត្តមអភិបាលខេត្តលើកឡើងបែបនេះ ក្នុងឱកាសដែលឯកឧត្តមចុះសួរសុខទុក្ខនិងចែកអំណោយទៅដល់បុគ្គលិកប្រមូលសំរាមរបស់ក្រុមហ៊ុនស៊ីនទ្រី និងក្រុមហ៊ុន លៀប លឹម សរុបចំនួន៩៧គ្រួសារនៅស្នាក់ការប្រមូលសំរាម ស្ថិតក្នុងសង្កាត់អូរម៉ាល់ ក្នុងបាត់ដំបង ដែលមានការអញ្ជើញចូលរួមពីឯកឧត្តម អភិបាលរងខេត្ត ឯកឧត្តមជាប្រធានមន្ទីរពាក់ព័ន្ធមួយចំនួន រួមជាមួយអាជ្ញាធរក្រុង ក្រុមយុវជន ស.ស.យ.ក.ក្រុងជាច្រើនរូបផងដែរ។
ជាមួយគ្នានេះ ឯកឧត្តមក៏បានថ្លែងអំណរគុណទៅដល់បុគ្គលិកក្រុមហ៊ុនទាំងពីរដែលកន្លងមកតែងតែខិតខំចូលរួមចំណែកការងារ សណ្តាប់ធ្នាប់ អនាម័យ នៅក្នុងខេត្តរហូតមកនូវសកម្មភាពទាំងអស់ ដើម្បីអោយទីក្រុងស្អាត និងទាន់ពេលវេលាជាងមុន ដូច្នេះសូមអោយប្អូនៗក្មួយៗបន្តជួយខេត្តយើងទៀតដើម្បីលើកមុខមាត់ការរស់នៅរបស់ប្រជាពលរដ្ឋខេត្តបាត់ដំបងយើងអោយកាន់តែមានកិត្យានុភាព។
បន្ថែមពីនេះឯកឧត្តមក៏បានណែនាំដល់បុគ្គលិកទាំងអស់ក្នុងឱកាសបុណ្យចូលឆ្នាំនេះ បងប្អូនដែលនៅខេត្តផ្សេងគឺមិនបានទៅផ្ទះទេ ដោយសាររាជរដ្ឋាភិបាលបិទផ្អាកមិនអោយឆ្លងកាត់ជាបណ្តោះអាសន្នចេញពីខេត្តមួយទៅខេត្តមួយរយ:ពេល១៤ថ្ងៃ ដូច្នេះសូមបងប្អូនសម្ងំនៅ និងប្តូវេណគ្នាធ្វើការជាធម្មតា កុំអោយចេញក្រៅ ហើយនៅចំពោះមុខ រាជរដ្ឋាភិបាលដើម្បីការពារជំងឺកូវីដយើងត្រូវអនុវត្តអោយបានខ្ជាប់ខ្ជួនទាំងអស់គ្នានូវ ៣កុំ ៣ការពារ ។
អំណោយដែលត្រូវចែកជូននាពេលនេះមាន! -អង្ក -មី -ត្រីខ -ទឹកត្រី ទឹកស៊ីអីវជាដើម ដែលជាអំណោយដ៏ថ្លៃថ្លារបស់ ឯកឧត្តម ស សុខា និងលោកជំទាវ កែ សួនសុភី តាមរយៈឯកឧត្តម ណុប ដារ៉ា និងលោកជំទាវ ហើយទោះបីជាអំណោយនេះវាតិចតួច ប៉ុន្តែវាជាតម្លៃនៃទឹកចិត្តចែករំលែកនូវការលំបាកផងដែរ៕