ក្នុងឱកាសជួបពិភាក្សាការងារជាមួយឯកឧត្តម ទៀ សីហា អភិបាលខេត្តសៀមរាប នាព្រឹកថ្ងៃទី២១ ខែ កក្កដា ឆ្នាំ២០២០នេះ ឯកឧត្តម Ermenegildo Kupa Lopes ឯកអគ្គរដ្ឋទូតនៃស្ថានទូតសាធារណរដ្ឋប្រជាធិបតេយ្យទីម័រខាងកើត ប្រចាំនៅព្រះរាជាណាចក្រកម្ពុជា បានស្នើសុំមន្ត្រីជំនាញរបស់ខេត្តសៀមរាប ធ្វើការបង្រៀនដល់ប្រជាពលរដ្ឋទីម័រ ពីវិស័យទេសចរណ៍ និងកសិកម្ម។
ឯកឧត្តមឯកអគ្គរដ្ឋទូត បានបញ្ជាក់ថា ការចុះបំពេញបេសកកម្មមកកាន់ខេត្តសៀមរាប នាពេលនេះ គឺដើម្បីធ្វើការសិក្សាស្វែងយល់ និង ទទួលបាននូវបទពិសោធន៍ក្នុងវិស័យទេសចរណ៍ និង កសិកម្មរបស់ខេត្តសៀមរាប សំដៅយកទៅធ្វើការផ្សព្វផ្សាយជូនដល់ប្រជាពលរដ្ឋទីម័រខាងកើត ហើយក្នុងនាមប្រជាពលរដ្ឋទីម័រ សុំធ្វើការរៀនសូត្រពីខេត្តសៀមរាប ដែលមានភាពរីកចម្រើនលើវិស័យទេសចរណ៍ នាពេលកន្លងមក ពិសេសសូមអរគុណដល់រាជរដ្ឋាភិបាលកម្ពុជា ដែលតែជួយគាំទ្រទីម័រក្លាយជាសមាជិកទី១១របស់អាស៊ាន។
ឆ្លើយតបក្នុងឱកាសនោះឯកឧត្តម ទៀ សីហា បានទទួលយកនូវសំណូមពររបស់ឯកឧត្តមអគ្គរដ្ឋទូត ហើយអាជ្ញាធរខេត្ត នឹងធ្វើការជ្រើសរើសពេលវេលាមួយដ៏សមគួរ ក្រោយពេលវិបត្តិជំងឺកូវីដ១៩ នឹងរៀបចំគណៈប្រតិភូទៅធ្វើទស្សនកិច្ចផ្លាស់ប្តូរបទពិសោធន៍គ្នាទៅវិញទៅមក ក្នុងការផ្តល់នូវសេចក្តីស្រឡាញ់រវាងប្រទេសកម្ពុជា និង ទីម័រខាងកើត។
ឯកឧត្តម ទៀ សីហា បានបញ្ជាក់ទៀតថា ខេត្តសៀមរាបមានសក្តានុពលសេដ្ឋកិច្ច ដោយពឹងផ្អែកលើវិស័យកសិកម្ម ដោយមានប្រជាពលរដ្ឋប្រមាណ ៨២ភាគរយជាប្រជាកសិករ និង វិស័យទេសចរណ៍ ខេត្តសៀមរាបសម្បូរទៅដោយប្រាង្គប្រាសាទល្បាញល្បី និង រមណីយដ្ឋានធម្មជាតិភ្នំគូលែន និង បឹងទន្លេសាប ដែលបានទាក់ទាញភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត ហើយក្នុងខណៈពេលដែលពិភពលោកបានកំពុងជួបប្រទះនូវវិបត្តិជំងឺកូវីដ១៩នេះ បានធ្វើឲ្យមានផលប៉ះពាល់យ៉ាងខ្លាំងដល់វិស័យទេសចរណ៍នៅខេត្តសៀមរាប ប៉ុន្តែអាជ្ញាធរខេត្តបាននឹងកំពូងយកចិត្តទុកដាក់ខ្ពស់ក្នុងការអនុវត្តសេចក្តីណែនាំរបស់រាជរដ្ឋាភិបាល និង ក្រសួងសុខាភិបាល មិនឲ្យមានឆ្លងរីករាលដាលនៅតាមសហគមន៍នោះឡើយ៕
