ខេត្តតាកែវ ដែនដីរាជធានីនគរគោកធ្លោក គឺជាដែនដីមានសក្តានុពលមួយលើវិស័យកសិកម្ម ហើយខេត្តនេះ បានជាប់ចំណាត់ថ្នាក់លេខ៣លើវិស័យកសិកម្ម បន្ទាប់ពីព្រៃវែង និងបាត់ដំបង។ នេះបើតាមប្រសាសន៍ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ឯកឧត្តមរដ្ឋមន្ត្រីបានថ្លែងថា ខេត្តតាកែវ ជាខេត្តមួយដែលមានប្រជាជនសរុប ១,០១៤,៤៧៣នាក់ ក្នុងនោះ ស្ត្រី ៥១៨,៨៨០នាក់ ដោយមានប្រជាពលរដ្ឋប្រមាណ ៧៩% ពឹងផ្អែកទាំងស្រុងលើវិស័យកសិកម្ម ធ្វើស្រែចម្ការ នេសាទត្រី និងចិញ្ចឹមសត្វ ដើម្បីទ្រទ្រង់ជីវភាពរស់នៅរបស់ខ្លួន។
ឯកឧត្តមបន្ថែមថា ខេត្តតាកែវមានផ្ទៃដីសម្រាប់ផលិតកម្មកសិកម្មចំនួន ២៦៤,០០០ហិកតា ក្នុងនោះផ្ទៃដីស្រូវរដូវវស្សាមានចំនួន ១៨០,០០០ហិកតា ស្រូវរដូវប្រាំងចំនួន ៨,០០០ហិកតា និងផ្ទៃដីចម្ការចំនួន ៤,០០០ហិកតា៕