ខេត្តបាត់ដំបង៖ មន្ត្រីអនុវត្តកម្មវិធី ASPIRE ស្រុកមោងឬស្សី កាលពីថ្ងៃទី១៤ ខែកក្កដា ឆ្នាំ២០២០ បានចុះពិនិត្យ និងជម្រុញការដាំដុះដល់កសិករបណ្តុំអាជីវកម្មម្នាស់ដែលទទួលបានការគាំទ្រពីកម្មវិធីផ្សព្វផ្សាយបច្ចេកទេសកសិកម្មថ្មីដែលធន់ទៅនឹងការប្រែប្រួលអាកាសធាតុ(ASPIRE)។
លោក អ៊ូច ភីរម្យ បានថ្លែងថា ការចុះទៅដល់មូលដ្ឋានពីសំណាក់ក្រុមការងារនៃកម្មវិធីASPIREនេះគឺដើម្បីធ្វើឲ្យប្រាកដថាបញ្ហាប្រឈមផ្សេងៗរបស់កសិករគឺត្រូវបានដឹងឮនិងយកមកពីភាក្សាដើម្បីធ្វើការដោះស្រាយ។
លោកថា សម្រាប់កសិករបណ្តុំអាជីវកម្មដាំដុះម្នាស់មោងឬស្សីនេះវិញដែលមានទីតាំងនៅភូមិព្រៃព្រំ២ ឃុំរបស់មង្គល ស្រុកមោងឬស្សីខេត្តបាត់ដំបង គឺពូកគាត់បានអនុវត្តទៅតាមបច្ចេកទេសដែលបានផ្តល់ជូនពីសំណាក់កម្មវិធីASPIRE ដោយក្នុងនោះក្រុមការងារបានពិនិត្យឃើញថាការដាំដុះរបស់ពួកគាត់មានការរៀបចំនូវកៅស៊ូខ្មៅគ្របរងដើម្បីការពារស្មៅចង្រៃនិងមានប្រើប្រព័ន្ធដំណក់ទឹកដែលជួយសន្សុំសំចៃទឹកនិងសម្រួលដល់កម្លាំងពលកម្មថែមទៀតផង។
គួរបញ្ជាក់ថា បណ្តុំអាជីវកម្មម្នាស់ត្រូវបានបង្កើតឡើងនៅឆ្នាំ២០២០ នៅភូមិព្រៃព្រំ២ ឃុំរបស់មង្គល ស្រុកមោងឬស្សីដែលមានកសិករចូលរួមចំនួន៥០គ្រួសារនិង មានផ្ទៃដីដាំដុះម្នាស់ចំនួន៤៨ហិកតា៕