ខេត្តព្រៃវែង ជាប់ចំណាត់ថ្នាក់លេខ១ ទូទាំងប្រទេសលើវិស័យកសិកម្ម (២០១៩-២០២០)។ នេះបើយោងតាមរបាយការណ៍ដែលឯកឧត្តម ជា សុមេធី អភិបាលខេត្តព្រៃវែង បានអានក្នុងឱកាសចូលរួមជាវាគ្មិនសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដព្រៃវែង» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី០៩ ខែកក្កដា ឆ្នាំ២០២០ នៅសាលសេរីភាព ទីស្តីការគណៈរដ្ឋមន្ត្រី។
ឯកឧត្តម បានឱ្យដឹងថា ខេត្តព្រៃវែង មានសក្តានុពលលើវិស័យកសិកម្ម ប្រជាពលរដ្ឋប្រមាណ៧៨,៦ភាគរយជាគ្រួសារកសិករ និងខេត្តជាប់ចំណាត់ថ្នាក់លេខ១ ទូទាំងប្រទេសលើវិស័យកសិកម្ម (ឆ្នាំ២០១៩-ឆ្នាំ២០២០)។ ខេត្តព្រៃវែង មានរោងម៉ាស៊ីនកិនស្រូវចំនួន១៥កន្លែង តុល្យភាពស្បៀងប្រចាំឆ្នាំ ក្រោយពីកាត់ចេញសម្រាប់ទុកបរិភោគ ទុកពូជ ចិញ្ចឹមសត្វ នៅសល់លើសពីតម្រូវការ គិតជាអង្ករ មានចំនួន៥៦០.៧៤៧តោន ស្មើនឹងស្រូវចំនួន ៨៧៦.១៦៧តោន សម្រាប់លក់ទៅទីផ្សារក្នុង និងក្រៅប្រទេស ដែលមានតម្លៃជាមធ្យម ៩២០រៀលក្នុង១គីឡូក្រាម។
ចំណែកដំណាំរួមផ្សំអនុវត្តសរុប ៩.៨៧ហិកតា រួមមានពោត ៣.៥០០ហិកតា អំពៅ៦៧១ហិកតា សណ្តែក ល្ង ឪឡឹក និងបន្លែគ្រប់មុខ៩០៦ហិកតា៕
