មាន់ខ្មៅក្នុងខេត្តតាកែវកំពុងមានតម្រូវការទីផ្សារទាំងពូជនិងសាច់សម្រាប់បរិភោគ ដែលធ្វើឲ្យកសិករចិញ្ចឹមមានចំណូលខ្ពស់ក្នុងសេដ្ឋកិច្ចគ្រួសារ ។
លោក ញិប ស្រ៊ន ប្រធានមន្ទីរកសិកម្ម រុក្ខាប្រមាញ់និងនេសាទខេត្តតាកែវមានប្រសាសន៍ថា រហូតមកដល់ពេលនេះនៅខេត្តតាកែវមានកសិដ្ឋានចិញ្ចឹមមាន់ខ្មៅចំនួន៥កន្លែង ក្រោមការផ្តល់បច្ចេកទេសពីមន្ទីរកសិកម្មខេត្តលើកម្មវិធីចុះផ្សព្វផ្សាយពីបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុជាបន្តបន្ទាប់ ។
លោកបន្តថា ក្រោយពេលទទួលបានបច្ចេកទេសនៃការចិញ្ចឹម បានធ្វើអោយមាន់ខ្មៅនេះ ទទួលបានលទ្ធផលល្អ ដោយក្នុងមួយក្បាលទម្ងន់ប្រមាណ២គីឡូក្រាម កសិករអាចលក់បានជាង១០ម៉ឺនរៀល បើប្រៀបធៀបទៅនឹងមាន់ខ្មែរឬមាន់ផ្សេងៗទៀតគឺមាន់ខ្មៅមានតម្លៃខ្ពស់ហើយមានទីផ្សារល្អ ។ ដោយឡែកសម្រាប់មាន់ខ្មៅពូជវិញ គឺមួយក្បាលតម្លៃចាប់ពី១២ម៉ឺនរៀលឡើងទៅ ។
សូមបញ្ជាក់ថា មាន់ខ្មៅអាចយកទៅកែច្នៃជាម្ហូបបានយ៉ាងច្រើនប្រភេទ ដូចជា មាន់ស្ងោ មាន់ចៀន សាច់ក្រក ប្រហិត សាច់ផាត់ ហើយការបរិភោគគឺជួយអោយមានសុខភាពល្អ រាងកាយមាំមួន៕ ប្រភព៖ ក្រសួងព័ត៌មាន