ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានសមត្ថកិច្ចគ្រប់គ្រងសាយតេស(CITES) កម្ពុជា បានសម្តែងការសោកស្តាយចំពោះប្រជានេសាទ និងអាជីវករលក់ដូរ នៅតែបន្តនេសាទ និងលក់ត្រីប្រភេទកម្រជាច្រើនប្រភេទ ជាពិសេសគឺត្រីគល់រាំង ដែលជាប្រភេទត្រីកម្រ និងស្ទើរផុតពូជពីកម្ពុជា។
តាមរយៈទំព័រហ្វេសប៊ុកនៅថ្ងៃទី៧ ខែកក្កដា នេះ ឯកឧត្តម ណៅ ធួក បានសរសេរថា ខ្ញុំសូមអង្វរជនរួមជាតិ សូមមេត្តាកុំសម្លាប់និងបរិភោគត្រីគល់រាំង ដែលជាត្រីតំណាងជាតិ កំណត់ដោយព្រះរាជក្រឹត្យលេខនស.រកត/0305/149 ចុះថ្ងៃទី២១ មីនា ឆ្នាំ2005។ រូបនេះ ថតបានពីផ្សារថ្មីកាលពីថ្ងៃចន្ទទី០៦ ខែកក្កដា ឆ្នាំ២០២០។
គួររំលឹកថា ត្រីគល់រាំង គឺជាត្រីតំណាងឲ្យអត្តសញ្ញាណជាតិខ្មែរ តាមរយៈព្រះរាជក្រឹត្យ ចុះថ្ងៃទី២១ ខែមីនា ឆ្នាំ២០០៥ ដោយហាមឃាត់ដាច់ខាត ការនេសាទ ទិញលក់ និងដឹកជញ្ជូន។ ត្រីគល់រាំង ជាប្រភេទត្រីទឹកសាបដែលមានទំហំធំបំផុតមួយ និងអាចមានប្រវែងពី ២ម៉ែត្រ ទៅ ៣ម៉ែត្រ និងទម្ងន់រហូតដល់ ៣០០គីឡូក្រាម៕