មន្ត្រីសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ខេត្តស្វាយរៀង កាលពីរសៀលចុងសប្តាហ៍កន្លងទៅ បានចុះត្រួតពិនិត្យទីតាំងសិប្បកម្មសរសៃគុយទាវ ១កន្លែង ក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង រកឃើញ និងដកហូតសសៃគុយទាវលាយសារធាតុគីមី ចំនួន២៥០គីឡូក្រាម។
លោកផឹង និល ប្រធានសាខា ក.ប.បខេត្ត បានឲ្យដឹងថា បន្ទាប់ពីរកឃើញសារធាតុគីមី ដាក់ក្នុងសរសៃគុយទាវ នៅផ្សារប្រសូត្រ ស្រុកស្វាយទាបរួចមកមន្ត្រីជំនាញយើង បានតាមរកប្រភពផលិត ទើបដឹងថានៅសិប្បកម្មសរសៃគុយទាវ ខេត្តស្វាយរៀង ដែលមានម្ចាស់ឈ្មោះ នង សុវណ្ណារិទ្ធ ជាម្ចាស់ទីតាំងស្ថិតក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង ក៏ស្នើរសុំព្រះអាជ្ញាសាលាដំបូងខេត្ត សហការចុះពិនិត្យតែម្តង។
លោកថា សរសៃគុយទាវ ទាំង២៥០គីឡូក្រាមនោះ គឺមានផ្ទុកសារធាតុគីមី (borax) ហើយបើសរុបទាំងទំនិញខូចគុណភាពផង គឺមានចំនួន៤៥០kg ត្រូវមន្ត្រីជំនាញ ធ្វើការដុតកម្ទេចចោល។ ចំណែកម្ចាស់សិប្បកម្មផលិតសសៃគុយទាវខាងលើ មន្ត្រីជំនាញបានធ្វើកិច្ចសន្យាណែនាំ កុំឲ្យផលិតសរសៃគុយទាវ ដាក់សារធាតុគីមី (borax) តទៅទៀត ដែលនាំឲ្យប៉ះពាល់ដល់សុខមាលភាព ប្រជាពលរដ្ឋយ៉ាងធ្ងន់ធ្ងរ ហើយបើព្រមរាងចាលទេ និងបិទសិប្បកម្មផលិតសរសៃគុយទាវ ចោលតែម្តង៕
