ស្រាថ្នាំ តាំង គួយ ប្រមាណ ២៧ ៧៥៦ដប ដែលមានសារធាតុគីមី (មេតាណុល) ត្រូវបានបំផ្លាញចោល នៅក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី១៧ ខែមិថុនា ឆ្នាំ២០២១។ កាលពីខែមិថុនា ឆ្នាំមុន ស្រាថ្នាំ តាំង គួយ បានសម្លាប់អ្នកផឹក ៧នាក់ និងច្រើននាក់ទៀត ត្រូវចូលពេទ្យសង្គ្រោះបន្ទាន់។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាការក្លែងបន្លំ ក.ប.ប. ខេត្តបន្ទាយមានជ័យ បានគូសបញ្ជាក់ថា ស្រាថ្នាំ តាំង គួយ បានបណ្តាលឱ្យមនុស្សពុលស្លាប់ ចំនួន ៧នាក់ (ជនជាតិថៃ ចំនួន ម្នាក់) ដែលក្នុងស្រាថ្នាំ នេះមានសារធាតុមេតាណុលកំរិតខ្ពស់ដល់ ១៤%។ នេះបើតាមរបាយការណ៍ក្រសួងសុខាភិបាល។
សូមរម្លឹកថា កាលពីថ្ងៃទី៧-៩ ខែមិថុនា ឆ្នាំ២០២០ ករណីពុលស្រាថ្នាំ តាំង គួយ បានកើតឡើង នៅស្រុកមង្គលបុរី ស្រុកម៉ាឡៃ និងនៅក្រុងប៉ោយប៉ែត ក្នុងខេត្តបន្ទាយមានជ័យ បណ្តាលឲ្យស្លាប់ ៧នាក់ និងច្រើននាក់ទៀត ចូលពេទ្យសង្គ្រោះបន្ទាន់។
យ៉ាងណាក៏ដោយ ក្នុងករណីពុលស្រាថ្នាំនេះ គឺអ្នកផលិតស្រាថ្នាំ តាំង គួយ មិនត្រូវបានចាប់មកផ្តន្ទាទោសតាមច្បាប់ឡើយ ហើយមួយឆ្នាំក្រោយមក នៅពេលនេះ ក៏អាចបន្តផលិតស្រាថ្នាំនោះ ដាក់លក់ឡើងវិញ រហូតដល់ត្រូវចាប់យកទៅបំផ្លាញចោលនៅពេលនេះ៕
