(ខេត្តប៉ៃលិន) ៖ ស្ត្រីម្នាក់ បាននិយាយរៀបរាប់ទាំងសេចក្តី សប្បាយរីករាយឱ្យភ្នាក់ងារសារ ព័ត៌មានដឹង ចេញពីក្នុងចិត្ត ខណ:គាត់ និងប្តី បាននាំគ្នា ដាំបន្លែសណ្តែកកួរជាង៣០រង លុះក្រោយមកក៏ដាំត្រសក់ផ្អ (ត្រសក់ទ្រើង) បេះលក់រាល់ថ្ងៃ បានប្រាក់សម្រាប់ផ្គត់ផ្គង់ជីវភាពប្រចាំថ្ងៃ ដោយមិនខ្វះមុខខ្វះក្រោយ ដូចពីមុន ។ហើយថែមទាំងសល់ថវិកា អាចសាងសង់ផ្ទះស្នាក់នៅជួបជុំក្រុមគ្រួសារ មិនភ័យខ្លាច អត់ឃ្លាន ឬជំពាក់បំណុលគេអ្វីនោះឡើយ ។
ចំពោះការប្រកបរបរដាំបន្លែលក់នេះ គឺពួកគាត់ ទើបតែប្រើរយ:ពេលត្រឹម២ឆ្នាំប៉ុណ្ណោះ ដែលធ្វើឱ្យជីវភាពមានការផ្លាស់ប្រែយ៉ាងឆាប់រហ័ស ក៏មិនបោះបង់មុខរបរមួយនេះដែរ។
បើតាមការរៀបរាប់ពីស្ត្រីម្នាក់ ឈ្មោះ សុខ ភាព អាយុ៥២ឆ្នាំ ប្តីឈ្មោះ ថេន នូ អាយុ៥០ឆ្នាំ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន បានរៀបរាប់ឱ្យដឹងថា ក្រោយពីដាំសណ្តែក កួរ ចំនួន៣២រងក្នុងរយ:ពេល១ខែជាង រួចប្រមូលផលអស់ គាត់ក៏ដកដើមចេញ ហើយបន្តដាំបន្លែត្រសក់ផ្អ ឬត្រសក់ទ្រើង ដោយចំណាយពេលត្រឹមតែ១ខែ១០ថ្ងៃប៉ុណ្ណោះ ក៏ចាប់ផ្តើមប្រមូលផលជាបណ្តើរៗ ក្នុង១ថ្ងៃ ជួនកាល បេះផ្លែបានចាប់ពី៧០ ទៅ៩០គីឡូក្រាម ក្នុង១គីឡូក្រាមគាត់អាចលក់ដុំនៅផ្សារ ចាប់ពី១៥០០ទៅ២០០០រៀល ។
គាត់បន្តទៀតថា មុននឹងទទួលបានផលគាត់ក៏ចំណា យដើមទុក ទិញដើមឫស្សីតូចៗ ធ្វើទ្រើង និងទិញអំបោះមងក្រឡាធំៗ យកទៅដាក់លាតបញ្ឈរឱ្យដំណាំនេះឡើងទ្រើង សរុបទៅរយ:ពេល១ឆ្នាំ ចំណាយដើមទុនអស់ជាង១លានរៀលប៉ុណ្ណោះ ។ ចំពោះការដាំបន្លែទាំងនេះ ពេលប្រមូលផលតែម្តង គឺរួចខ្លួនថ្លៃចំណាយទាំងអស់ ហើយក្រៅពីនេះ គឺចំណេញថវិកា សម្រាប់យកទៅសងជំពាក់ បំណុលគេ និងទុកសម្រាប់ផ្គត់ផ្គង់ជីវភាពប្រចាំថ្ងៃផងដែរ ។
គាត់បញ្ជាក់ថា ការដាំបន្លែនេះ គឺវិលជុំ ដោយបន្ទាប់ពីប្រមូលផលផ្លែត្រសក់អស់ គាត់ចាប់ផ្តើមជីកដីដាក់ហាលរយ:ពេលប្រហែល១ខែ រួចចាប់ផ្តើមដាំសណ្តែកកួរ ជាបន្តបន្ទាប់ ដោយប្រើជីធម្មជាតិលាមកសត្វគោ មិនប្រើជីគីមីនោះទេ ដើម្បីសុខភាពខ្លួនឯង និងអ្នកទិញយកទៅទទួលទាន ។
ប៉ុន្តែនៅរដូវវស្សា ការដាំបន្លែក៏អត់សូវបានផលច្រើនដែរ ព្រោះភ្លៀងជោកជាំ នាំឱ្យជ្រួចទឹក អត់ សូវផ្លែ ។ ចំណែកនៅរដូវប្រាំង ក៏មានការលំបាក បើសិនជារាំងស្ងួតខ្លាំងនោះបណ្តាលឱ្យខះទឹកស្រះអស់ អត់មានទឹកបូមស្រោច ។ តែទោះបីជាយ៉ាងណា គាត់ក៏បានបុកអណ្តូងស្នប់១ ទុកដល់ពេលខ្វះខាតទឹក នឹងបូមស្រោចដំណាំទាំងអស់នោះ ។
រហូតមកដល់ពេលនេះ គាត់ក៏បានប្រមូលផលផ្លែត្រសក់លក់នៅផ្សារសាមគ្គី ហៅប៉ាហ៊ី បានច្រើនសារហើយដែរ គឺមិនធ្លាប់សល់នោះទេ ពោលគឺឱ្យតែមានម៉ូយទិញយកទាំងអស់តែម្តង ៕