មេដឹកនាំកូរ៉េខាងជើង លោក Kim Jong Un បានសន្យានឹងពន្លឿនការអភិវឌ្ឍឃ្លាំងអាវុធនុយក្លេអ៊ែរ នៅក្នុងក្បួនដង្ហែយោធាមីស៊ីលផ្លោងអន្តរទ្វីប (ICBMs)។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង។
ក្បួនដង្ហែនេះ ធ្វើឡើងកាលពីយប់ថ្ងៃចន្ទ ដើមសប្តាហ៍កន្លងទៅ នៅក្នុងពិធីខួបលើកទី៩០ នៃកងកម្លាំងប្រដាប់អាវុធរបស់ប្រទេសកូរ៉េខាងជើង។ មេដឹកនាំកូរ៉េខាងជើង លោក Kim បានថ្លែងថា ប្រសិនកងកម្លាំងណាមួយព្យាយាមរំលោភផលប្រយោជន៍របស់យើង កងកម្លាំងនុយក្លេអ៊ែរ នឹងត្រូវបានដាក់ចេញ។
បើតាមមន្ត្រីការទូតអាមេរិក និងកូរ៉េខាងត្បូង បាននិយាយថា យើងមានសញ្ញានៃការសាងសង់ទីតាំងសាកល្បងនុយក្លេអ៊ែរថ្មីមួយទៀត នៅលើទឹកដីកូរ៉េខាងជើង។
គួរបញ្ជាក់ថា ទីក្រុងព្យុងយ៉ាង បានបង្កើនការសាកល្បងអាវុធ និងការបង្ហាញថាមពលយោធា ខណៈដែលកិច្ចពិភាក្សាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិកនៅជាប់គាំងនៅឡើយ ក្រោយរដ្ឋ បាលអភិរក្សថ្មី ទើបចូលកាន់អំណាចនៅក្នុងប្រទេសកូរ៉េខាងត្បូង៕