នៅក្នុងបរិការណ៍បច្ចុប្បន្នដែលកម្ពុជាកំពុងស្ថិតក្នុងវិបត្តិជំងឺកូវីដ-១៩នៅឡើយ បន្ទាប់ពីព្រឹត្តិការណ៍សហគមន៍២០កុម្ភៈ២០២១និងការបន្តរីករាលដាលនៃមេរោគកូរ៉ូណាបំប្លែងថ្មីដែលបង្កឱ្យមានផលប៉ះពាល់អវិជ្ជមានធ្ងន់ធ្ងរដល់សុខភាពសង្គមសេដ្ឋកិច្ចនិងជីវភាពរស់នៅរបស់ប្រជាពលរដ្ឋ ព្រមទាំងកំពុងដាក់សម្ពាធកាន់តែធ្ងន់មកលើថវិកាជាតិទាំងមូល។
ដោយហេតុខាងលើនេះ រាជរដ្ឋាភិបាលក៏បានស្នើឡើងនូវសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ដែលរដ្ឋសភាបានកោះប្រជុំនិងអនុម័តរួចរាល់កាលពីពេលកន្លងទៅថ្មីៗនេះនិងបានស្នើមកព្រឹទ្ធសភាបើកសម័យប្រជុំវិសាមញ្ញនីតិកាលទី៤របស់ខ្លួន ដើម្បីធ្វើកិច្ចពិភាក្សានិងផ្តល់យោបល់លើសេចក្តីព្រាងច្បាប់ទាំងនេះដោយចាត់ទុកជាការប្រញាប់។ ឆ្លើបតបនឹងសំណើរចាំបាច់ខាងលើ នៅព្រឹកថ្ងៃទី០២ ខែធ្នូ ឆ្នាំ២០២១ ព្រឹទ្ធសភាកម្ពុជា បានបើកសម័យប្រជុំវិសាមញ្ញនីតិកាលទី៤ក្រោមវត្តមានដ៏ខ្ពង់ខ្ពស់របស់សម្តេចវិបុលសេនាភក្តីសាយឈុំ ប្រធានព្រឹទ្ធសភានៃព្រះរាជាណាចក្រកម្ពុជានិងមានសមាជិកចូលរួមចំនួន៥៤រូប ព្រមទាំងតំណាងរាជរដ្ឋាភិបាលចូលរួមការពារយ៉ាងហ្មត់ចត់ផងដែរ។
ឯកឧត្តម ម៉ម ប៊ុននាង អ្នកនាំពាក្សព្រឹទ្ធសភាបានមានប្រសាសន៍បញ្ជាក់នៅក្រោយកិច្ចប្រជុំវិសាមញ្ញនេះថា ចំពោះសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២នេះ អាចប្រសិទ្ធនាមថា ជាថវិកាសម្រាប់បន្តការប្រយុទ្ធប្រឆាំង និងការកសាងសមត្ថភាពរស់នៅជាមួយនឹងជំងឺកូវីដ-១៩ តាមគន្លងប្រក្រតីថ្មី ដើម្បីបន្តប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ចនិងជីវភាពរស់នៅរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារនិងជំរុញកំណើនសេដ្ឋកិច្ចឡើងវិញ។ ថវិកាឆ្នាំ២០២២នេះគឺជាឧបករណ៍ដ៏មានប្រសិទ្ធភាពដែលអាចជួយឱ្យរាជរដ្ឋាភិបាលបន្តគ្រប់គ្រងសភាពការណ៍វិបត្តិនៃជំងឺកូវីដ-១៩ និងអាចឆ្លើយតបទៅនឹងបញ្ហាប្រឈមព្រមទាំងហានិភ័យផងទាំងពួងទាំងក្នុងនិងក្រៅប្រទេសដើម្បីស្តារនិងជំរុញកំណើនសេដ្ឋកិច្ចឱ្យស្ថិតលើគន្លងនៃកំណើនខ្ពស់ឡើងនិងរស់រវើកវិញ ហើយអាចឆ្លើយតបបានទៅនឹងបំណងប្រាថ្នារបស់ប្រជាជនផង ក៏ដូចជាជួយរាជរដ្ឋាភិបាលឱ្យសម្រេចបាននូវបុព្វហេតុចម្បងៗស្របតាមទិសដៅនៃការកែទម្រង់ស៊ីជម្រៅរបស់ខ្លួនឱ្យកាន់តែមានប្រសិទ្ធភាពនិងសំដៅនាំនាវាកម្ពុជាឆ្ពោះទៅកាន់ត្រើយសុខសន្តិភាពយូរអង្វែង វឌ្ឍនភាពវិបុលភាពនិងយុត្តិធម៌សង្គម។
សេចក្តីព្រាងច្បាប់នេះ តាក់តែងឡើងមាន០៥ជំពូក និង១៤មាត្រា ត្រូវបានរដ្ឋសភានៃព្រះរាជា-ណាចក្រកម្ពុជាអនុម័តយល់ព្រមជាលើកដំបូងចំនួន១០៤សំឡេង នៃចំនួនសមាជិករដ្ឋសភាទាំងមូលកាលពីថ្ងៃទី២៥ខែវិច្ឆិកាឆ្នាំ២០២១នាសម័យប្រជុំរដ្ឋសភាលើកទី៦នីតិកាលទី៦។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុអមដោយថ្នាក់ដឹកនាំមន្ត្រីជាន់ខ្ពស់និងមន្ត្រីជំនាញបានអញ្ជើញមកការពារសេចក្តីព្រាងច្បាប់នេះយ៉ាងហ្មតចត់ផងដែរ។
អង្គប្រជុំព្រឹទ្ធសភាបានពិនិត្យនិងឱ្យយោបល់ឯកភាពទាំងស្រុងលើសេចក្តីព្រាងច្បាប់ទាំងមូលដោយឥតកែប្រែចំនួន៥៤សំឡេងនៃចំនួនសមាជិកព្រឹទ្ធសភាទាំងមូល។
ក្រៅពីនេះ កិច្ចប្រជុំព្រឹទ្ធសភា ក៏បានលើកយក សេចក្តីព្រាងច្បាប់ ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២០ និងសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារអាស៊ាន ស្តីពី ការពង្រឹងយន្តការដោះស្រាយវិវាទ មកពិនិត្យ និងឯកភាពទាំងស្រុង លើសេចក្តីព្រាងច្បាប់ទាំងមូលដោយឥតកែប្រែនឹងចាត់ទុកជាការប្រញាប់៕
