យោងតាមការចេញផ្សាយរបស់សារព័ត៌មានក្នុងស្រុកបានអោយដឹងថា ពលករខ្មែរប្រុសស្រីចំនួន ១៤នាក់ត្រូវបានក្រុមទាហានឈុតពិសេសរបស់ថៃ ចាប់ខ្លួនខណ:ដែលពួកគេលបលួចឆ្លងដែនចូលរកការងារធ្វើនៅក្នុងប្រទេសថៃដោយខុសច្បាប់។
ការឃាត់ខ្លួននេះធ្វើឡើងកាលពីព្រឹកថ្ងៃទី ២៩ ខែសីហា ឆ្នាំ២០២១ នៅត្រង់ចំណុចភ្នំកូនដំរី ស្ថិតក្នុងឃុំតាប្រាក់យ៉ា ស្រុកតាប្រាក់យ៉ា ខេត្តស្រះកែវ ប្រទេសថៃ ខណៈដែលពលករខ្មែរទាំង ១៤នាក់ បានលបលួចឆ្លងព្រំដែនចូលទៅក្នុងទឹកដីថៃ ដោយដើរកាត់តាមចំការ ស្របពេលដែលកម្លាំងទាហានឈុតពិសេសថៃ សហការជាមួយកម្លាំងតម្រួតព្រំដែនលេខ ១២ កំពុងល្បាតនៅក្នុងភូមិសាស្ត្រខាងលើ។
ក្រោយការចាប់ខ្លួនពលករខ្មែរទាំង ១៤នាក់ ដែលក្នុងនោះស្រី ០៦នាក់បានសារភាពថា ពួកគេមកពីខេត្តបន្ទាយមានជ័យ ដោយបានប្រមូលផ្តុំគ្នានៅក្នុងឃុំល្មៀត ស្រុកថ្មពួក ដោយមានមេខ្យល់នាំផ្លូវនិងត្រូវចំណាយក្នុងម្នាក់ ៦.០០០ បាត និងត្រូវដើរកាត់ចំការដើម្បីឡើងទៅលើផ្លូវជាតិត្រង់ចំណុច បានណាងង៉ាម ហើយនៅពេលដល់គោលដៅទើបត្រូវចាយលុយ ដែលគោលដៅត្រូវទៅគឺ ,ខេត្តស្រះកែវ ០១ នាក់ ,ខេត្តរ៉ាក់យ៉ង ០២ នាក់ , ខេត្តឆ:ឈើងសៅ ០២ នាក់ និងទីក្រុងបាងកក ចំនួន ០៩ នាក់ ។
ក្រោយពេលឃាត់ខ្លួន ក្រុមយោធាថៃបានត្រួតពិនិត្យសុខភាពពួកគេទាំងអស់ និងបានបញ្ជូនទៅអោយតម្រួតព្រំដែនលេខ ៣៨ ដើម្បីប្រគល់ទៅអោយភាគីកម្ពុជាវិញតាមច្រកអូរបីជាន់ ផងដែរ៕