(ភ្នំពេញ)៖ លោក ជិន ម៉ាលីន អ្នកនាំពាក្យក្រសួងយុត្ដិធម៌ បានប្រកាសថា នៅក្នុងឆ្នាំ២០២០ខាងមុខនេះ ក្រសួងយុត្តិធម៌នឹងដាក់ឲ្យដំណើរការសាលាឧទ្ធរណ៍នៅខេត្តចំនួន៣ទៀត ខណៈបច្ចុប្បន្ននេះ ប្រទេសកម្ពុជាមានសាលាឧទ្ធរណ៍តែមួយប៉ុណ្ណោះ។
ក្នុងសន្និសីទសារព័ត៌មានស្តីពីសមិទ្ធផល១ឆ្នាំ ក្រោយការបោះឆ្នោត កាលពីព្រឹកថ្ងៃទី០១ ខែសីហា ឆ្នាំ២០១៩ លោក ជិន ម៉ាលីន បានលើកឡើងថា បច្ចុប្បន្ននេះ កម្ពុជាមានសាលាឧទ្ធរណ៍តែមួយនោះទេ គឺសាលាឧទ្ធរណ៍ភ្នំពេញ ដែលដោះស្រាយគ្រប់សំណុំរឿងដែលបានបញ្ជូនពីគ្រប់សាលាដំបូងរាជធានីទាំងអស់។
បើតាមការបញ្ជាក់របស់លោក ជិន ម៉ាលីន ខេត្តទាំង៣ដែលគ្រោងនឹងបង្កើតឲ្យមានសាលាឧទ្ធរណ៍នោះ រួមមានខេត្តត្បូងឃ្មុំ ខេត្តបាត់ដំបង់ និងខេត្ត ព្រះសីហនុ។
ជាមួយគ្នានេះដែរ អ្នកនាំពាក្យក្រសួងយុត្តិធម៌រូបនេះក៏បានអះអាងដែរថា ក្រសួងក៏គ្រោងនឹងបង្កើតសាលាដំបូងនៅខេត្តកែបមួយទៀត ខណៈបច្ចុប្បន្នខេត្តមួយនេះបានប្រើប្រាស់តុលាការរួមគ្នាជាមួយតុលាការខេត្តកំពត៕