ខេត្តប៉ៃលិន ៖ តាំងពីដើមខែរហូតមកដល់ថ្ងៃទី១០ ខែមិថុនា ឆ្នាំ២០២១នេះ ដំណាំសាវម៉ាវ ចាប់ផ្តើមទទួលបានផលផ្លែ អាចបេះលក់ឱ្យភ្ញៀវទិញយកទៅទទួលទាន ជួបជុំគ្រួសារ ។
បើតាមការរៀបរាប់ពីមេការម្នាក់ ឈ្មោះ កែម ពៅ ភេទប្រុស អាយុ៤៣ឆ្នាំ រស់នៅភូមិរោងចក្រ សង្កាត់បរយ៉ាខា ក្រុងប៉ៃលិន ខេត្តប៉ៃលិន បានប្រាប់ភ្នាក់ងារយើងឱ្យដឹងកាលពីរសៀលថ្ងៃទី៩ ខែមិថុនា ឆ្នាំ២០២១នេះថា ៖ ម្ចាស់ចំការខាងលើ មាន ឈ្មោះ សេង រ៉ន អាយុជាង៦០ឆ្នាំ រស់នៅក្នុងក្រុងប៉ៃលិន ហើយបានដាំដំណាំសាវម៉ាវជាង៧០០ដើម រហូតមកដល់ពេលនេះ គាត់ចាប់ផ្តើមប្រមូលផលជាបណ្តើរៗ ហើយ គឺបេះលក់ឱ្យភ្ញៀវ ដែលធ្វើដំណើរចេញចូលទៅលេងរមណីយដ្ឋានចំការខ្នុរ និងរមណីយដ្ឋានផ្សេងៗ ទៀត ដោយតម្លៃទីផ្សារផ្លែសាវម៉ាវពេលនេះ ម្ចាស់លក់ក្នុង១គីឡូក្រាម ត្រឹមតែ៦០០០រៀលប៉ុណ្ណោះ ។ គាត់បន្តទៀតថា ក្រៅពីដំណាំសាវម៉ាវ ម្ចាស់ចំការ ក៏បា នដាំ ដំណាំតាង៉ែនជាង២០០ដើម, ម៉ាក់ប្រាងជាង១០០ដើម, មង្ឃុតជាង១០០ដើម, ដាំដើមទុរេនមួយចំនួន ក៏មានដំណាំចេកណាំវ៉ា ស្វាយកែវរមៀត ព្រមទាំងក្រូចឆ្មាផងដែរ ។
មេការដែលធ្វើការក្នុងចំការខាងលើ បានបន្ថែមទៀតថា ដំណាំសាវម៉ាវ មិនមានការបញ្ជាឱ្យ ផ្លែដូចជាដំណាំតាង៉ែននោះទេ គឺផ្លែតាមរបៀបធម្មជាតិ គ្រាន់តែពេលចាប់ផ្តើមចេញផ្កាក្តិប ដំណាំប្រភេទនេះ ទាមទារឱ្យស្រោចទឹកជាញឹកញាប់ ១ទៅ២ថ្ងៃ ម្តង ។ បើមិនដូច្នោះទេ អាចនឹងជ្រុះក្តិប ឬពេលផ្លែធំ អាចនឹងប្រេះបែក ខូចខាតថែមទៀតផង ។ ការដាំសាវម៉ាវមិនមិនលំបាកប៉ុន្មានទេ តែម្ចាស់ចំការជួលកម្មករឱ្យជម្រះស្មៅ បាញ់ថ្នាំកំចាត់សត្វល្អិត និងសម្លាប់ដង្កូវតែម្តងគត់ គឺពេលដំណាំនេះចាប់ផ្តើមផ្កា លុះក្រោយមក គេស្រោចទឹករហូតដល់ផ្លែវាទុំ ទើបប្រមូលផលលក់ជាបណ្តើរៗ រហូតដល់អស់ ។
គាត់បញ្ជាក់ថា សាវម៉ាវនេះ ម្ចាស់នាំពូជចូលមកពីប្រទេសថៃ ដែលមាន ឈ្មោះ «រុងរៀន» ជាច្រភេទសាវម៉ាវកំប៉ុង ដែលគេអាចទិញយកទៅធ្វើផ្លែឈើកំប៉ុង សម្រាប់រក្សាទុកបានយូរ លក់ចេញទៅក្រៅប្រទេសថែមទៀតផង ។ តែនៅឆ្នាំ២០២១នេះ ដោយសារវិបត្តិជំងឺកូវីដ១៩ ធ្វើឱ្យភ្ញៀវមានការថយចុះ អត់សូវមានអ្នកចូលទៅទិញច្រើនដូចកាលពីឆ្នាំមុនៗ នោះទេ ដោយបច្ចុប្បន្នក្នុង១ថ្ងៃ អាចបេះលក់ បានត្រឹម៥០ទៅ៦០គីឡូក្រាមប៉ុណ្ណោះ ៕