ខេត្តបាត់ដំបង! នៅចុងសប្តាហ៍នេះ ឯកឧត្តម ងួន រតនៈ អភិបាលខេត្តបាត់ដំបង បានចាត់តាំងឯកឧត្តម សឿម ប៊ុនរិទ្ធ អភិបាលរងខេត្ត និងជាអ្នកនាំពាក្យនៃរដ្ឋបាលខេត្តបាត់ដំបង ឲ្យចុះពិនិត្យមើលនិងត្រៀមរៀបចំនូវទីតាំងវិទ្យាល័យចំនួន០២កន្លែងបន្ថែមសំរាប់ព្យាបាលអ្នកជំងឺកូវីដ-19 នៅតាមបណ្តាស្រុកជាប់ព្រំដែនថៃ ។
ដោយយោងតាមផេកហ្វេសប៊ុកផ្លូវការ របស់ឯកឧត្តម សឿម ប៊ុនរិទ្ធ នៅថ្ងៃទី០៥ ខែមិថុនាឆ្នាំ២០២១នេះ បានបញ្ជាក់ថា៖ ក្នុងនាមតំណាងឯកឧត្តម ងួន រតនៈ អភិបាលខេត្ត បានចុះពិនិត្យរៀបចំទីតាំងសម្រាប់សំរាកព្យាបាលអ្នកជំងឺកូវីដ-19នៅតាមបណ្តាស្រុកជាប់ព្រំដែនថៃ ចំនួន ០២កន្លែង ដែលស្ថិតនៅក្នុងស្រុកកំរៀងនិងស្រុកសំពៅលូន នៃខេត្តបាត់ដំបង ដោយមានការចូលរួមពីលោកអភិបាលស្រុក លោកប្រធានការិយាល័យសុខាភិបាលស្រុកប្រតិបត្តិ កងកម្លាំងសមត្ថកិច្ច និងអាជ្ញាធរមូលដ្ឋានពាក់ព័ន្ធ និងមន្ត្រីសុខាភិបាលជាច្រើនរូបផងដែរ។
នៅដំណើរចុះពិនិត្យមើលនិងកំណត់យកនូវទីតាំងសម្រាប់ធ្វើការសំរាកព្យាបាលអ្នកជំងឺកូវីដ-19 នៅស្រុកទាំង០២ខាងលើនេះ ត្រូវ បានសម្រេចជ្រើសយកទីតាំង “វិទ្យាល័យកំរៀង”ដែលស្ថិតនៅក្នុងស្រុកកំរៀង ចំនួន០១កន្លែង និង បានត្រៀមរៀបចំបម្រុងមួយកន្លែងទៀតនៅ “អនុវិទ្យាល័យជ្រៃសីមា” ដែលស្ថិតនៅក្នុង ស្រុកសំពៅលូន ខេត្តបាត់ដំបង ។
ការរៀបចំនូវទីតាំងសំរាប់ព្យាបាលអ្នកជំងឺកូវីដ-19 ក្នុងភូមិសាស្ត្រស្រុកកំរៀងនិងស្រុកសំពៅលូនទាំង២នេះ គឺ៖បន្ទាប់ពីមានការឆ្លង និងពីការចម្លងមកពីប្រជាពលរដ្ឋដែលរស់នៅក្នុងស្រុកខាងលើនេះ បានធ្វើដំណើរចេញ-ចូលទៅរកស៊ី និងបានពាក់ព័ន្ធ និងទីតាំងកាស៊ីណូ នៅក្នុងខេត្តប៉ៃលិនកន្លងមក ហើយលំហូរប្រជាពលរដ្ឋនិងការធ្វើតេស្តសំណាកពីបងប្អូនវិលត្រឡប់មកពីទីកន្លែងខាងលើនេះភាកច្រើនតេស្តវត្ថុសំណាករកឃើញករណីវិជ្ជមានកូវីដ-19 ជាបន្តបន្ទាប់និងកើនឡើងគួរឲ្យកត់សម្គាល់ ដែលតម្រូវឲ្យអាជ្ញាធរនៃរដ្ឋបាលខេត្តនិងមន្ទីរឮសុខាភិបាលនៃរដ្ឋបាលខេត្តបាត់ដំបង រួមជាមួយអាជ្ញាធរមានសមត្ថកិច្ចពាក់ព័ន្ធក្នុងមូលដ្ឋានផ្ទាល់ ដើម្បីរៀបចំទីតាំងសម្រាប់ការព្យាបាលបងប្អូនអ្នកជម្ងឺកូវីដ-19នៅទីតាំងថ្មីនេះ។