ខេត្តបាត់ដំបង ៖ នៅថ្ងៃទី៣១ ខែឧសភា ឆ្នាំ២០២១ សាខាកាកបាទក្រហមកម្ពុជា ខេត្តបាត់ដំបង បានបើកកិច្ចប្រជុំស្តីពីការបូកសរុបលទ្ធផលសកម្មភាពការងារប្រចាំត្រីមាសទី១ ឆ្នាំ២០២១ និងលើកទិសដៅអនុវត្តបន្ត ក្រោមអធិបតីភាពឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាខេត្ត នៅទីស្នាក់ការសាខាខេត្ត ដោយមានការអញ្ជើញចូលរួមពីសមាជិក សមាជិកា គណៈកម្មាធិការសាខា និងក្រុមប្រតិបត្តិសាខាខេត្ត សរុបចំនួន ១៩នាក់ ស្រី ៧នាក់។
កិច្ចប្រជុំនេះមានរបៀបវារៈដូចខាងក្រោម៖
១.មតិសំណេះសំណាលបើកកិច្ចប្រជុំរបស់ឯកឧត្តមប្រធានអង្គប្រជុំ
២.របាយការណ៍បូកសរុបលទ្ធផលសកម្មភាព និងរបាយការណ៍ហិរញ្ញវត្ថុប្រចាំត្រីមាសទី១ និងលើកទិសដៅអនុវត្តបន្ត
៣.របាយការណ៍កៀរគររកមូលនិធិដើម្បីអបអរខួបលើកទី ១៥៨ ទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា ឆ្នាំ ២០២១ ក្រោមប្រធានបទ“ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងជំងឺកូវីដ-១៩ និង កសាងភាពធន់របស់សង្គមជាតិ”
៤.មតិចូលរួមយោបល់របស់គណៈកម្មាធិការសាខា
៥.មតិបូកសរុបលទ្ធផលកិច្ចប្រជុំរបស់ឯកឧត្តមប្រធានអង្គប្រជុំ។
មានប្រសាសន៍បើកកិច្ចប្រជុំ ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខា បានសម្តែងការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ សមាជិក សមាជិកា មន្ត្រីក្រុមប្រតិបត្តិ ដែលបានខិតខំបំពេញភារកិច្ចយ៉ាងសកម្ម ជំរុញធ្វើឲ្យវិស័យស្នូលទាំង ៤ របស់កាកបាទក្រហមកម្ពុជា ទោះបីមានការរំខានពីវិបត្តិកូវីដ ១៩ យ៉ាងណាក្តី ក៏សាខាបានពុះពារធ្វើសកម្មភាព រហូតសម្រេចបានលទ្ធផលគួរជាទីមោទនភាព។
អង្គប្រជុំបានឯកភាពទាំងស្រុងនូវរបាយការណ៍លទ្ធផលការងារ និងរបាយការណ៍ហិរញ្ញវត្ថុ ប្រចាំត្រីមាសទី១ និងទិសដៅសម្រាប់អនុវត្តបន្ត ដែលមតិលើកឡើងរបស់គណៈកម្មាធិការសាខា លើរបាយការណ៍ទាំងពីរ និងទិសដៅអនុវត្តបន្ត ។
មានប្រសាសន៍បូកសរុបកិច្ចប្រជុំ ឯកឧត្តមបណ្ឌិតប្រធានគណៈកម្មាធិការសាខា បានដល់ក្រុមប្រតិបត្តិសាខាបន្តយកចិត្តទុក ដាក់ចលនាសប្បុរសជនចូលរួមឧបត្ថម្ភក្នុងឱកាសអបអរខួបលើកទី ១៥៨ ទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា ឆ្នាំ ២០២១ និងសហការជាមួយអនុសាខាស្រុកក្រុង ត្រូវចុះពិនិត្យជាក់ស្តែងពីស្ថានភាពរបស់ប្រជាពលរដ្ឋដែលងាយរងគ្រោះ និងគ្រួសារដែលរងគ្រោះដោយសារគ្រោះមហន្តរាយផ្សេងៗ ដើម្បីឆ្លើយតបឲ្យបានទាន់ពេលវេលា និងពង្រឹងបន្ថែមលើការងាររដ្ឋបាល និងហិរញ្ញវត្ថុ ការងារស្វែងរកមូលនិធិត្រូវជួយ គៀងគរមន្ថែម និយាយជារួមដោយផ្តោតសំខាន់ទៅលើការរៀបចំ និងការប្រព្រឹត្តទៅនៃការងារស្នូល របស់សាខា និងអនុសាខាទាំងអស់បានអនុវត្តតាមវិស័យស្នូលទាំង ៤ ឲ្យមានដំណើរការល្អស្របតាម អាណត្តិនៃការងារ ។
ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាបានថ្លែងអំណរគុណចំពោះគណៈកិត្តិយសសាខា គណៈកម្មាធិការសាខា និងសប្បុរសជន ជាពិសេសក្រុមក្រឡាហោមមនុសធម៌ដែលដឹកនាំដោយ ឯកឧត្តម ខាន់ ម៉ាណេរ ជាប្រធានដែលបានចូលរួមចំណែកសកម្មភាពមនុស្សធម៌ជួយសម្រាលការលំបាករបស់បងប្អូនប្រជាពលរដ្ឋក្នុងខេត្តបាត់ដំបង។
ជាកិច្ចបញ្ចប់នៃកិច្ចប្រជុំ ឯកឧត្តម ប្រធានគណៈកម្មាធិការសាខា បានផ្តាំផ្ញើអោយសមាជិក សមាជិកា គណៈកម្មាធិការសាខា ត្រូវបន្តពួតដៃគ្នាដើម្បីធ្វើការងារមនុស្សធម៌នេះជាបន្តទៀត ដើម្បីជួយសង្គ្រោះដល់បងប្អូនប្រជាពលរដ្ឋដែលគាត់ជួបទុក្ខលំបាក និងដើម្បីរួមចំណែកជាមួយនឹងរាជរដ្ឋាភិបាលដើម្បីកាត់បន្ថយភាពក្រីក្រនៅក្នុងប្រទេសកម្ពុជាយើងនេះផងដែរ និងសូមអោយក្រុមការងារបង្កើនការប្រុងប្រយ័ត្នខ្ពស់ចំពោះការការពារជំងឺកូវីដ-១៩ ដោយអនុវត្តតាមការណែនាំរបស់ក្រសួងសុខាភិបាល និងវិធានការ ៣កុំ ៣ការពារ និង២ចូលរួម ។
