ខេត្តបាត់ដំបង! កាលថ្ងៃទី ២៤ ខែឧសភា ឆ្នាំ ២០២១ លោកវរសេនីយ៍ឯក ម៉ង់ ស៊ី មេបញ្ជាការវរសេ នា តូចនគរបាលការពារព្រំដែនគោកលេខ៨១៩ បានដឹកនាំកងកម្លាំងក្នុងអង្គភាព សហការណ៍ជាមួយសមត្ថកិច្ចពាក់ព័ន្ធនៅចំណុចឈរជើង ព្រមទាំងអាជ្ញាធរថៃបានធ្វើការទប់ស្កាត់ករណី នាំចេញដោយមិនស្របច្បាប់នៅចំណុចភូមិសាស្ត្រទទួលខុសត្រូវក្នុងស្រុកកំរៀង ខេត្តបាត់ដំបង ។
ជាមួយកិច្ចប្រតិបត្តិការល្បាតយ៉ាងយកចិត្តទុកដាក់ខាងលើនេះដែរ ជាលទ្ធផលកម្លាំងសមត្ថកិច្ចជំនាញបានប្រទះរកឃើញមនុស្សប្រុសស្រីចំនួន ២០នាក់មានទាំងកុមារតូចផង ដែលករណីនេះ ត្រូវបានដាក់ការសង្ស័យថាមានមនុស្សជាមេខ្យល់ចំនួន០២នាក់កំពុងប៉ុនប៉ងនាំឆ្លងដែនទៅកាន់ប្រទេសថៃ ដោយមិនស្របច្បាប់។
សមត្ថកិច្ចបានអោយដឹងថា ក្នុងស្ថានភាពដែលប្រទេសថៃ កំពុងមានកំណើនករណីឆ្លងជម្ងឺកូវីដ១៩ រាល់ថ្ងៃ និងមានបងប្អូនប្រជាពលករដែលកំពុងធ្វើការនៅប្រទេសថៃចាកចេញពីប្រទេសថៃ ចូលមក ប្រទេសកម្ពុជា រាល់ថ្ងៃដែលក្នុងនោះបានរកឃើញថាពួកគាត់មួយចំនួនបាននាំយកនូវវីរូស នៃជម្ងឺកូវីដ១៩មកជាមួយផងនោះ ពេលទន្ទឹមគ្នាក៏ឃើញមានប្រជាពលរដ្ឋមួយចំនួនបាននិងកំពុងព្យាយាម ចាកចេញពីប្រទេសកម្ពុជា ចូលទៅក្នុងប្រទេសថៃ ដោយមិនស្របច្បាប់ តាមរយៈការអូសទាញដឹកនាំរបស់មុខសញ្ញាជាមេខ្យល់ ដែលស្ថានភាពបែបនេះ ពួកគាត់កំពុងប្រថុយប្រថានយ៉ាងខ្លាំងទាំងករណីឆ្លងជម្ងឺកូវីដ១៩ផងនិងចំ ពោះ អំពើល្មើសច្បាប់ផង ។
ទិដ្ឋភាពចំនួនពីរក្នុងពេលតែមួយដូចខាងលើនេះ តម្រូវឱ្យសមត្ថកិច្ចនគរបាល និងសមត្ថកិច្ចអាជ្ញាធរពាក់ព័ន្ធ ដែលកំពុងឈរជើងបំពេញភារកិច្ចនៅចំណុចជួរមុខ បង្កើនសកម្មភាពទ្វេរដង ទាំងការស្វែងរកពួកគាត់ដែលឆ្លងចូល មកពីប្រទេសថៃ តាមច្រករបៀងដើម្បីនាំទៅធ្វើចត្តាឡីស័ក តាមវិធានសុខាភិបាលផង និងស្វែងរកពួកគាត់នៅក្នុងភូមិសាស្ត្រទទួលខុសត្រូវ ដើម្បីរារាំងទប់ស្កាត់ឱ្យបាននូវករណី នាំចេញដោយខុសច្បាប់ពីប្រទេសកម្ពុជាទៅកាន់ប្រទេសថៃផង។
សមត្ថកិច្ចបានបញ្ជាក់បន្ថែមថា បន្ទាប់ពីបានធ្វើការឃាត់ខ្លួនរួចហើយ មនុស្សទាំង២០នាក់ ត្រូវបាននាំទៅប្រគល់ជូនសមត្ថកិច្ចនៃអធិការដ្ឋាននគរបាលស្រុក កំរៀងដើម្បីធ្វើកា រ សាកសួរនិងអនុវត្តបន្តតាមនីតិវិធី៕
