ខេត្តបាត់ដំបង៖ ប្រជាពលរដ្ឋរស់នៅក្នុងខេត្តបាត់ដំបង ដែលភាគច្រើនទំនេរពីការធ្វើស្រែ ពួកគាត់បាននាំគ្នាឆក់ចាប់យកការដាំដំណាំបន្លែរួមផ្សំបន្ថែមដើម្បីស្តាជីវភាពរស់នៅប្រចាំថ្ងៃ ក្នុងដំណាក់កាលដែលប្រទេសជាតិកំពុងជួបវិបត្តិជំងឺឆ្លង វីរុសកូវីដ-១៩។
ប្រជាពលរដ្ឋឈ្មោះ ជិន រស់នៅភូមិរាមសេនា ឃុំល្វា ស្រុកបវេល បានលើកឡើងអោយអ្នកយកព័ត៌មានយើងបានដឹងថា អ្នកភូមិរាមសេនាជាច្រើនគ្រួសារបានប្រកបរបរដាំដំណាំកសិកម្ម ដែលក្នុងនោះទំនេរពីការធ្វើស្រែ ពួកគាត់បាននាំគ្នាដាំដំណាំបន្លែបង្ការផ្សេងៗសំរាប់លក់ដើម្បីផ្គត់ផ្គង់ជីវភាពគ្រួសារ ដោយឡែកគ្រួសារលោកស្រីវិញបានចាប់យកការដាំដំណាំប្រភេទបន្លែសណ្តែកគួរ ក្នុងទំហំផ្ទៃដីពីររ៉ៃ ស្មើចំនួន២៦រងដោយឃើញថារបរមួយនេះអាចរកចំណូលបានគួរសម និងមិនសូវពិបាកក្នុងការថែទាំដូចដំណាំដទៃនោះទេ ។
លោកស្រីបានបន្តថា ឆ្នាំកន្លងទៅគ្រួសារលោកស្រីដាំតែដំណាំប្រភេទបន្លែត្រសក់ តែឆ្នាំនេះគ្រួសារលោកស្រីបានងាកមកដាំដំណាំសណ្តែកគួរវិញ ព្រោះដំណាំប្រភេទនេះ មិនសូវមានអ្នកដាំ ហើយតម្លៃក៏មិនសូវធ្លាក់ចុះខ្លាំងដូចដំណាំផ្សេងៗនោះដែរ។ហើយការដាំដុះវិញយើងប្រើរយៈពេលពីរខែទើបឲ្យផលជាបណ្ដើរៗ និងអាយុវាបើមិនមានការរាំងស្ងួតឬទឹកលិចនោះទេ វាអាចរស់បានច្រើនខែ និងប្រមូលផលបានច្រើនដងផងដែរ។
ការប្រមូលផលដំបូងក្នុងមួយថ្ងៃយើងអាចបេះបានចាប់២០គីឡូក្រាម ទៅ៥០គីឡូក្រាម ដែលជាមធ្យមក្នុងមួយគីឡូក្រាមលក់បានតម្លៃ ២៥០០រៀល ដោយឈ្មួញកណ្តាលមកប្រមូលទិញដល់ផ្ទះអស់មិនពិបាករកទីផ្សារនោះទេ ព្រោះតម្រូវការប្រើប្រាស់ប្រជាពលរដ្ឋចូលចិត្តបរិភោគច្រើន ហើយតម្លៃបើធ្លាក់ចុះក៏ធ្លាក់បន្តិចបន្តួចដែលយើងអាចទទួលយកបាន ព្រោះវាមិនធ្លាក់ខ្លាំងដូចជាដំណាំត្រសក់នោះទេ ។
គួរបញ្ជាក់ផងដែរថា ប្រជាពលរដ្ឋរស់នៅក្នុងខេត្តបាត់ដំបង ក្រៅពីការធ្វើស្រែ ពួកគាត់ភាគច្រើនបាននាំគ្នាចាប់យកការដាំដំណាំរួមផ្សំផ្សេងៗគ្រប់ប្រភេទ ដើម្បីផ្គត់ផ្គង់ស្តារជីវភាពក្នុងដំណាក់កាលដែលប្រទេសជាតិកំពុងជួបវិបត្តិជំងឺឆ្លងវីរុសកូវីដ-១៩៕